E MALESA MAS KOMUN RIBA NOS ISLA SERKA KACHO TA E MALESA DI KARPATA, TAMBE KONOSÍ BOU DI E NÒMBER EHRLICHIOSE. E NÒMBER AKI TA BIN DOR DI E BAKTERIA KU TA OKASHONA E MALESA AKI KU YAMA EHRLICHIA CANIS. E BAKTERIA TA BIBA DEN E SANGER DI E KACHO I TA TRANSMITÍ E MALESA AKI PA MEDIO DI KARPATA, E KACHONAN POR BIRA HOPI MALU DI E MALESA AKI I TE HASTA E POR KONDUSÍ NA MORTO.

 

Brown dog tick
Brown dog tick

E kachó ta keda kontagia dor di e bakteria despues di un mordé di karpata. Pa esaki ta 1 karpata so ta nesesario! E chèns pa keda kontagia ku e malesa aki, ta bira mas ku klaro mas grandi si e kachó tin mas karpata riba dje. Un karpata na Kòrsou ta bebe solamente pa mas o ménos 4 ora miéntras e ta riba e kachó. Esaki ta nifiká ku no ta un garantia ku e kachó no a wòrdu mordé dor di un karpata, solamente pasobra bo no a mira e karpata riba dje. No ta tur karpata ta infektá ku e bakteria ku ta okashoná e malesa aki, pero tur karpata na Kòrsou posiblemente por ta infektá ku e bakteria aki.

Na e momento ku e kachó pega ku e malesa aki e bakteria ta drenta den e globulo blanku di sanger. Einan e ta safe kontra di tur atake di e sistema imunológiko. Aki e ta haña e posibilidat di multipliká trankil.

Platelet
Plaka di sanger

Kehonan ku bo ta mira na promé instansia ora ta trata di e malesa di karpata ta kentura, kome malu, slap, glándula hinchá, mancha blou (manera sla) i sangramentu fásil. E dos último nan aki ta keda okashoná pa motibu ku e bakteria ta afektá e plakanan di sanger ku ta baha di kantidat. E plakanan ta manera un sorto di disko den e sanger ku ta hunga un papel na promé instante pa loke ta trata e kohamentu di sanger. Si no tin masha di e diskonan aki den e sanger, esaki ta nifiká ku e kachó lo sangra hopi sin ku esaki por koha òf stòp. Asina ta ku e kachónan aki ta sigui sangra hopi despues ku a kita karpata for di nan kurpa.

Otro efekto ku e malesa di karpata aki por tin kuné ta ku e globulonan blanku di sanger tambe ta redusí. Esaki tin komo konsekuensia ku e kachó ta bira mas vulnerabel pa infekshon. Despues di e fase agudo di e malesa aki bo ta bin topa bo ku otro keho. Kachónan por bira flaku, ni maske ku nan ta kome bon, nan por haña anemia, problema ku wowo i tin bia hasta síntoma neurológiko. Sin tratamentu e malesa di karpata por okashoná morto!
E tratamentu ta konsistí di un tratamentu ku sierto antibiótika, doxycycline. Si e kachó no ke kome i ta hopi malu por ta nesesario pa dun’é e remedi via di inyekshon durante e promé dia(nan). Ora e kachó ta kome por kuminsá ku píldora. Lokual ku tambe ta importante ta pa duna e kachó e remedi durante un periodo largu. Hopi bia bo ta mira ku e kachónan ta kuminsá mehorá i ku e doño ta stòp di dun’é e remedi. Esaki ta duna e bakteria e chèns pa bolbe multipliká lokual ku ta bolbe pone e kachó bira malu den korto tempu. E tratamentu kontra di malesa di karpata mester dura por lo ménos 3 siman, pero mas bia ta trata un temporada di 4 te 6 siman. Dependiendo di e estado di bo kachó e veterinario por skohe pa dun’é tratamentu adishonal ku otro remedi manera prednison òf heru.
Lokual ku ta hasi e ehrlichiose un malesa hopi ferfelu ta, ku e por bai skonde den e wesu di lomba. E kachó no ta sinti nada di esaki i bo no ta mir’é den e tèstnan di sanger. Diripiente e por duna keho na momentu ku e bakteria bai multipliká su mes atrobe. Esaki ta e motibu dikon un kachó por keda diagnostiká ku e malesa aki, ni maske e doño no ta mir’é ku karpata.
Pa finalisá, no tin bakunashon òf algu semehante eksistente kontra di e malesa di karpata. E úniko kos ku por yuda protehá e kachó ta evitá karpata riba dje. Pa por kumpli ku esaki tin diferente método optenibel. Konsulta ku bo veterinario pa determiná kiko ta e mihó opshon pa bo.

 

E INFORMASHON AKI TA INTENSHONA PA UZA DURANTE, PROME I DESPUES DI KONSULTA KU E VETERINARIO. NA E INFORMASHON RIBA E PAGINA AKI NO POR DERIVA NIUN DERECHI. NI MASKE E INFORMASHON TA SKIRBÍ PA UN VETERINARIO E POR TIN EROR DEN DJE. NIUN WEPSAIT NO POR REMPLASA – E KONTAKTO OF KONSULTA- KU UN VETERINARIO. DEN KASO DI DUDA, TUMA KONTAKTO KU BO VETERINARIO!

©Rescueracao, Meente Schijf. Translation Denice Bezemer.