Bichi di kurason ta un malesa ku ta eksistí serka kachó na Kòrsou i hopi otro pais na mundu. E bichi di kurason, ku ofisialmente yama Dirofilaria immitis, ta keda transmití via di sangura. E ta un malesa ku por okashoná morto sí no trat’é i e tratamentu ta karu i tin su riesgonan kuné. Prevenshon di bichi di kurason serka kachó ta fásil.
E bichi di kurason ta keda transmití pa sierto sangura. E tipo di sangura aki ta biba prinsipalmente den e regionnan kalor. E sangura ta chupa un larva di e bichi di kurason di den e sanger di un kachó afektá. Den e sangura e larva ta keda krese te ora e ta sufisiente grandi pa e por afektá un kachó. Pa medio di e skupi di e sangura e larva ta bin den e kueru di kachó. Ei e larva ta sigui krese un tiki mas te ora e drenta ardunan i transladá su mes pa e ardunan mayó di e pulmon. Ei e larva ta krese bira un bichi adulto, 6 pa 7 luna despues di a kontagia e kachó e bichi adulto mes ta bai produsí larva.
Bichi di kurason por tei pa hopi tempu sin ku bo ta nota síntoma. E larvanan por, miéntras nan ta riba e kueru, sòru pa un inflamashon di e kueru. Esaki tin un nòmber spesial, cutane dirofiliasis. E kehonan ku e por duna ta entre otro grawatashi, pèrdida di kabei, e área afektá ta kòrá, e tin ròchi i pustema na e kueru. Esaki ta kos ku por kura fásil si duna tratamentu kontra di e bichi adulto.
E bichinan adulto di kurason ta duna problema den e (ardunan di) pulmon. Asina nan por koha e sanger i forma klòmpi lokual ku por keda trasladá dor di e kurpa i ta blòkia e ardunan chikí (embolia). Esaki no tin nodi di ta un problema tur kaminda den e kurpa, pero si ta trata ardunan chikí di órganonan importante manera e pulmon, kurason òf e serebro, e por tin konsekuensia dañino pa e kachó. Bichinan di kurason por okashoná subida di e preshon di e arteria mayó di e pulmon, esaki tin komo konsekuensia ku e pulmon por yena ku líkido. Komo ku e defensa di e pulmonnan a bira suak e por haña pulmonia mas lihé.
E kurason mes tambe por haña daño. Si tin hopi bichi presente nan por drenta den e parti drechi di e kurason. Aki nan lo stroba e funshonamentu di e klèpnan di kurason, lokual ku por kondusí na insufisiensia. E kehonan ku por surgi por ehèmpel ta akumulashon di vògt den e kurpa. Bichinan di kurason tambe por okashoná perturbashon di e igra òf nir. E daño hasí na kurason, igra i nir no ta algu ku por keda kurá despues di tratamentu di e bichinan.
E riesgo di mas grandi di infekshon ku bichi di kurason ta “caval syndrome”. Esaki ta e resultado di e bichinan den e ardunan den i rondó di e kurason. Den e kasonan aki e globulo kòrá di sanger ta wòrdu destruí den e ardunan mes, ta surgi un preshon abou, e bestianan ta resultá den shòk i muri masha lihé. Mayoria bia ta bin haña e bestianan ku ta sufri di e kos aki morto, sin ku a ripara nada anteriormente.
Por diagnostiká e bichi di kurason di un manera masha simpel pa medio di un tèst di sanger. Tin diferente manera pa hasi esaki, pero serka mayoria di tèst e resultado por ta konosí denter di 1 òf 10-20 minüt. Kachónan ku no a haña produktonan pa prevení, òf ku a keda sin haña esaki durante un periodo, ta konsehabel pa hasi e tèst aki sea promé ku operashon òf promé ku ke (bolbe) kuminsá ku e produktonan preventivo. Si e resultado ta negativo por kuminsá sin problema ku e prevenshon di bichi di kurason. Si e resultado ta positivo mester duna e kachó tratamentu.
Melarsomine (Immiticide ®)
E tratamentu di e bichi di kurason ta karu i e no ta sin riesgo. Tin diferente protokòl kon pa trata e bichi di kurason, pero mihó resultado bo ta mira ku e protokòl di “split-dose”. Esaki ta enserá ku e kachó ta haña na promé instante un tratamentu ku antibiótika, doxycycline, pa un temporada largu. Esaki ta para e fertilidat di e bichi i ta kòrta den su durashon di bida. Banda di esaki ta preskribí tambe prednison, ku ta mengua e inflamashon. E kurpa por reakshoná hopi fuerte riba e bichinan ku ta muriendo i esaki por okashoná problema. E prednison ta evitá e problemanan aki di tuma lugá. E kachó lo tin ku kuminsá tambe ku produktonan preventivo kontra di bichi di kurason pa evitá ku e por bolbe keda kontagia. Despues di un luna di antibiótika i prednison tin ku sigui inyekshon ku melarsomine (Immiticide®). Esaki ta e supstansia ku ta mata e bichinan adulto. Ta masha importante pa mantené e kachó trankil despues di e inyekshon, pasobra e morto di tur e bichinan por hisa e riesgo di embolia. Mester bolbe duna e kachó prednison pa yuda e kurpa baha e reakshon. Despues di 2 luna e kachó ta bolbe haña 2 inyekshon, 2 dia sigui. Despues di e inyekshonnan aki e kachó mester bolbe haña un tratamentu di prednison i tin ku mantene e kachó trankil. Komo ku e líkido ku ta inyektá e kachó kuné su fecha di vensementu ta limitá una bes ku bo a hasi uzo di dje, lo tin ku kobra pa henter un bòter ni maske ta trata un kachó chikí. Esaki ta hasi e tratamentu hopi karu. Despues di 6 luna ta tèst e kachó pa kontrolá si e ta liber di bichi di kurason.
Ni maske e tratamentu ariba menshoná ta rekomendabel pa mayoria kachó, tòg tin sierto kachó ku lo no por kuné. Pensa por ehèmpel riba kachónan bieu òf ku tin un malesa króniko. Esakinan lo tin ku keda trata ku e método “slow-kill”. Ku e tratamentu aki no ta mata e bichinan adulto sino ta sòru solamente pa no bin mas bichi aserka esaki bo ta logra si e bichinan no por prokreá i ta kòrta den e durashon di bida. E kachónan aki lo tin ku haña ku regularidat antibiótika i prednison, banda di profilaksis mensualmente. E desbentaha di e método aki ta no solamente ku e bichinan adulto por sigui okashoná daño na e kurason i besindario, pero tambe ku e kachó aki ta kontagioso pa otro kachó. E método aki ta di bèrdat solamente pa e kachónan ku no por haña un tratamentu ku e Immiticide®.
Pa terminá un palabra tokante di prevenshon di bichi di kurason. Manera mayoria di kos prevení ta mihó ku kombatí.
Diferente produktonan di prevenshon di bichi di kurason.
Tin diferente produkto riba merkado ku ta protehá e kachó kontra di bichi di kurason. Na Kòrsou e produkto mas uzá ta Heartgard®. Esaki ta manera un mangel ku smak di karni ku mayoria kachó ta gusta i ta kome fásil. Tin ku duna e produkto aki tur luna pa protehá kontra di transmishon. Kachónan ku ta entre di 3 pa 6 luna di edat tin ku kuminsá kuné. Kachónan mas bieu òf ku a uza un temporada e produkto Heartgard® i stòp, tin ku hasi tèst promé kuminsá atrobe. Por ta e kaso ku e kachónan aki ta infektá kaba ku e bichi di kurason. Otro produkto ku por hasi uzo di dje pa prevení bichi di kurason ta por ehèmpel Milbemax®, Nexgard Spectra® i Revolution®. Puntra bo veterinario kiko ta e mihó produkto pa bo kachó.
E INFORMASHON AKI TA INTENSHONA PA UZA DURANTE, PROME I DESPUES DI KONSULTA KU E VETERINARIO. NA E INFORMASHON RIBA E PAGINA AKI NO POR DERIVA NIUN DERECHI. NI MASKE E INFORMASHON TA SKIRBÍ PA UN VETERINARIO E POR TIN EROR DEN DJE. NIUN WEPSAIT NO POR REMPLASA – E KONTAKTO OF KONSULTA- KU UN VETERINARIO. DEN KASO DI DUDA, TUMA KONTAKTO KU BO VETERINARIO!