Ora nos ta papia di kemadura, nos no ta papia solamente di kemadura okashoná pa kandela/kayente. Un bestia tambe por haña kemadura na diferente manera. Kayente di mas, friu di mas, stom, inhalá huma òf airu kayente, un shòk eléktriko, solo òf algu kímiko por okashoná kemadura.
Ta konosí kaba ku un kemadura por ta konsistí di diferente grado pero kon bo ta rekonosé un ke otro?
Kemadura di promé grado, e kueru ta hasi doló ora mishi kuné i e ta kòrá i e por haña blar.
Kemadura di segundo grado, esaki ta sumamente doloroso pa e bestia, e kueru ta mustra manera pèrkamènt i e ta seku. E ta hinchá na e lugá kaminda tin e herida.
Kemadura di tersera grado, esaki ta e kemadura masha serio, e lana ta laga lòs. E kueru ta mustra sea blanku òf e ta pretu manera karbon. Komo ku e nervionan ta afektá kisas e no ta sinti doló.
Kiko pa hasi:
• Laga awa friu basha riba e lugá aki òf pone un “icepack” pa mas o ménos 15 minüt riba dje òf te ora e temperatura di kurpa normalisá
• Tene kuidou pa hipotèrmia, si e bestia kuminsá tembla stòp di fri’é
• No hunta nada di loshon òf kos vèt riba e herida
• Si akaso e herida ta grandi òf e bestia ke lembé, tap’é ku algu ku no ta pega. No hasi uzo di katuna pasobra e ilunan por pega riba e herida
• Dun’é awa ku suku, pero solamente si e no ta fuera di konosementu i ku e por guli bon
Den kaso di kimamentu tin chèns grandi pa deshidratashon, infekshon i shòk, manera bo kaba di fria e herida bai un veterinario inmediatamente. E lo sigui enkargá su mes ku e kuido di e bestia pa evitá pió. Kemadura ta algu sumamente serio ku no tin mag di balotá.
©Rescueracao, translation Denice Bezemer. Like us @ Facebook