Pa kombiná kachónan adulto ta algu ku por duna masha suspenso i kaminda hopi kos por bai robes. Unda ku bo buska informashon bo ta tende òf lesa pa laga nan sera konosí ku otro riba un tereno neutral. Pero laga nos ta franko, esaki hopi bia no ta posibel…Sigur no kaminda ta trata di mas kachó ku bo tin i ku no a kustumá di sali bai niun kaminda.

Ku Carf mi a optené hopi eksperensia kon pa kombiná kachónan òf kachónan individual den un grupo grandi eksistente. E ta keda algu ku ta sòru pa suspenso, ni maske kuantu bia bo a hasié. E riesgo di bringamentu semper ta presente.

Awor mi tin algun tep kon pa fasilitá e proseso aki. E promé ku ta hopi importante ta, enkuentro ku un waya meimei NUNKA no ta logra. Kasi semper e kachónan ta reakshoná agresivo kontra di otro, i komo ku nan no por yega serka di otro e tenshon ta subi. Bo por konta riba ku ora nan topa otro, kasi semper nan ta bringa ku otro.

Sòru pa bo tin maske ta 1 hende mas aserka. Pone èmber di awa, laken i basora kla. Esaki ta puru pa un situashon di emergensia pa por los kachónan ku ta bringando for di otro. Ta EKSTRIKTAMENTE PROHIBI pa tin mucha aserka. Mi ta buta esaki ku lèter kapital pa algun motibu. Un introdukshon ta algu ku bo por hasi solamente 1 bia. Si kos bai robes e chèns pa pone e kachónan aki huntu ta bira chikí. Bo no por paga tinu i riba kachó i riba un mucha. Mucha ke hunga, pero nan hungamentu ta sòru pa inkietut, algu ku na e momento ei bo no por uza. Muchanan hopi bia ta sumamente kontentu ku e kachó nobo òf nan ta loko ku nan kachó bieu, esaki lo por tin komo konsekuensia ku nan lo ke hasi nèt e kosnan ku lo por stroba na momentonan krusial, manera ku un pelucho òf ku bala òf algu semehante. Anto…imaginá bo si algu bai robes, lo bo ke pa bo yu ta kana meimei? No esei no ta algu ku bo ke.

Sòru pa no tin kuminda, kos di hunga, wesu, bala òf algu semehante den kura na e momento ei. Kompetensia/defensa di pertenensia na e momentonan ei no ta útil.

20130804_1838Pa e introdushon bai mas sigur ku ta posibel ta pone tur kachó ku ta pertenesé na e kas ei kaba paden. Sòru pa nan no tin bista riba e kura kaminda e enkuentro lo bai tuma lugá i pa evitá e efekto di waya meimei. E kachó nobo mester haña e espasio pa e eksplorá e kura sin ku e ta mará pero si e mester tin su banchi bistí i lag’é trankilisá di e transporte pa e kas. Ora e bira trankil, hopi bia esaki ta despues di 10-20 minüt, nos ta bai introdusí e kachónan eksistente kaba un pa un. Ta saka e promé kachó pafó. Pa e kachónan aki tambe ta konta ku nan no mester ta mará, pero sí nan mester tin nan banchi bistí. Si e ta mará/wanta na algu esaki ta un estorbo i por duna motibu pa agresividat. E kachó no por skohe pa hui i ataká ta su úniko defensa. Si e kachó a bin pafó ta bon pa abo alehá for di e situashon. No bai para tur hende rondó di nan, si e kachónan bin den bo direkshon, hala bai. Asina bo ta evitá ku bo kachó ta sintié respaldá pa bo anto ku e ta sinti e nesesidat di bai mustra kiko e por. Keda ketu, sòru pa trankilidat i opservá. No mishi ku e kachónan i wak pa bo no tin kuminda huntu ku bo. Si 1 di 2 buska protekshon serka bo esaki ta oké, bo por karisi’é masha trankil pa e sa ku ta oké i ku bo ta serka dje pero manera e otro bin serka bo ta stòp inmediatamente. No bai papia eksitá, si bo papia mes, hasi esaki trankil i ku stèm bahá. Eksitashon ta kondusí na eksitashon.

Úniko momentu ku bo por intervení ta si bo mira ku e tenshon ta subi. E kachónan ta kuminsá kambia i bira steif den nan aktitut, i nan ta kuminsá bira rondó di otro. Bo ta mira kon a karanan ta kambia i nan ta hisa lep, yama e kachónan di un manera alegre serka bo. Lokual ku hopi bia tambe ta yuda ta sòru pa un distraishon. Kore bai den un otro direkshon for di kaminda nan ta i miéntras tantu bo ta yama bo mes kachó di un manera alegre ku stèm haltu. Si esaki no ta funshoná bo por purba ku un NO duru i konsistente….E arte ta pa bo haña un balansa entre intervení muchu lihé òf muchu slo. Hopi bia ménos interakshon entre abo i e kachónan ta funshoná mihó ora nan sera konosí ku otro i bo t’ei solamente pa intervení si e situashon mester sali for di man. Sobra bo ta para ei manera palu di lus.

Si e kachónan no hasi otro kaso, ta masha bon no bai fòrsa nada. Asina tur dos kachó ta duna indikashon ku nan no ta sinti ku e otro ta un peliger pa nan i ku nan no tin gana di konflikto. No fòrsa nada i laga nan hasi nan kos. Esaki ta algu positivo.

Tur kos a bai bon i trankil? Ripití for di e promé stap ku e siguiente kachó.

Kiko si nan bai bringa…Por sosodé ku en bèrdat tin bringamentu. Bo a hasi tur lokual ku ta ariba deskribí sin salta nada? Wak bon si esaki ta e kaso bo sa unda kos a bai robes.

Si akaso nan bringa i bo no por par’é ku bo stèm intervení un be. No laga e kachónan bringa!!! Niun hende no tin benefisio na esaki. Esun ku pèrdè lo no sintié sigur. Esun ku gana lo sinti e eksperensia di esun ganadó i eksitoso lokual ku lo kondusí na mas bringamentu. Tin algun manera pa para nan. Un èmber ku awa por para nan pa algun sekònde pa asina bo por alehá nan for di otro. Laken bo por uza pa laga kai riba e kachó miéntras bo ta para su tras pa asina bo por sake for di e situashon aki. E mihó manera ta si esaki sosodé na mes momentu ku e otro kachó tambe. Basora bo por buta entre di e kachónan ku ta bringando pa asina para nan. Lokual ku tambe ta funshoná ta si bo ta ku dos hende, para tras di e kachónan i tene e kachónan pareu na nan pianan di patras hisa nan na laira i ranka nan for di otro. Realisá bo mes si ku ora tin 2 kachó ta bringando ku esaki ta E situashon den kua hende ta wòrdu mordé. Nan no ta morde bo konsientemente pero miéntras nan ta bringando ora bo gara nan, nan ta konsiderá esaki komo un mordé di e otro kachó. Komo reakshon lo e kachó por morde bo si bo gar’é òf si bo hinka bo pia den e bringamentu. Pues sea kouteloso i kuerdo ora bo intervení.

Si tur kos a bai bon lo bo tin tur kachó huntu awor. Lo tuma algu di tempu pa e trankilidat regresá. Sea kouteloso den e periodo benidero ora di duna kuminda. Pone e kachónan na distansia for di otro pa evitá konflikto ora di kome. Mi mes ta pone tur kachó den kouchi ora mi ta duna nan kuminda. Asina kada un por kome segun nan mes ritmo i niun no por kome for di baki di e otro. Tene kuidou ku wesu i kuki i tipo di kosnan semehante. Nan tambe por kondusí lihé na pleitu. Wega di tiramentu ku bala tambe por sòru un be pa konflikto. Semper por tin 1 ganadó i esaki por kondusí na pleitamentu. Ora bo yega kas i nan bin kuminda bo tambe. Mantené esaki mas trankil ku ta posibel. Mas entusiasmá bo ta mas entusiasmá nan tambe bira. Lokual ku tambe por kondusí na pleitamentu ta situashon di alegria ku ta bai kompañá ku hopi eksitashon di legria. Despues di algun siman ku nan konosé otro un tiki mas mihó bo por laga bai un tiki mas.

Yu di kachó mayoria bia no ta duna problema esei bo ta “hinka” asina meimei, drenta kuné den bo brasanan paden, laga nan hole un tiki n’e i pone abou.

©Rescueracao. Translation Denice Bezemer. Like our Facebook page