Ousilio! Mi a haña un nèshi di yu di pushi….

Hopi bia mi ta risibí yamadanan ku e partisipashon aki. Mi promé reakshon ta: NO MISHI KUNE!

E persona ku a mèldu ta pensa mayoria bia:”Ai Dios, nan ta drumi aki sin mama. Laga mi kue nan lihé i bai ku nan!” Ni maske e intenshon ta bon, e kos aki ta ROBES! Koutela ta rekomendabel. Hopi bia e mama ta den besindario i a bai buska algu di kome. E por a spanta tambe di bo i el a bai skonde pa bo.
Ta di suma importansia pa vigilá e nèshi i studi’é pero sigur no mishi kuné. Purba na kalkulá kon bieu e yunan ta.

Ni maske ta un yu di pushi so bo a topa, e mama por ta den serkania. For di e momento ku e yunan di pushi tin 6- 7 siman nan ta bai eksplorá nan besindario. Pero nan ta keda serka banda di e aria ku nan ta konsiderá nan kas.
fb_img_1458089330343Kon bo ta ripara ku e mama ta den serkania?

  • E yunan di pushi no ta yora i ta drumi trankil.
  • Si bo ta sinti ku e yunan su temperatura ta kayente i nan ta drumi i mustra masha trankil.
  • Si nan barika ta mustra rondó i yen i nan no ta yora.

Ki ora e chèns ta grandi ku e mama no a bin bèk serka su yunan?

  • Si bo sinti ku e yunan ta friu i/òf muhá ora bo mishi ku nan.
  • Si bo ta nota ku e yunan ta yora so sin stòp
  • Ora bo ripara ku nan no ta drumi huntu i pega ku otro, nan ta yora i ta friu ora bo mishi ku nan

Ora un òf mas yu a muriManera bo por ripara e ta posibel ku e mama ta den serkania di su yunan. Un mama di pushi no ta laga su nèshi lihé, i sigur no si e yunan ta hopi chikí. Pero e tambe tin ku kome, esei ta nifiká ku lo e tin ku bai laga su yunan pa un tempu kòrtiku. Ora e mama bai buska kuminda pa e kome, semper e ta keda den besindario di su yunan. Sí bo ta sinta wak e yunan e mama por ta den bo besindario, ta bon skondí, ta wak abo. Pasobra e ta tira bista riba su yunan ku wowo di falki.

Ke men sí e yunan di pushi ta drumi trankil i nan ta satisfecho:

Laga nan na pas, pasobra nan mester di nan mama ainda!! E chèns di sobreviví di yunan di pushi lantá ku bòter ta hopi chikí. Nos nunka no por remplasá e mama di pushi: su lechi, su amor i kalor ta inigualabel i no por keda kompará ku e kuido ku nos por duna ni maske kon bon nos intenshon ta. Pero keda vigilá e nèshi si i bai wak kada tantu ora.
Si akaso e mama di pushi ta kuida su yunan pafó, ni maske e ta un pushi di mondi i e no ta laga bo yega serka dje, nos ta laga su yunan keda serka dje te ora nan tin por lo ménos 5 siman (sí nan ta safe i ta haña bon kuido). Si e ambiente no ta un sigur pa nan bo por purba gana e mama i su yunan paden. Mester evitá semper pa kita e yunan for di e mama.

fb_img_1458089496924

Dikon e edat di sinku siman?
E yunan di pushi na e momento ei por para riba nan pianan i nan ta kla pa bai konosé mundu. Pero e ora ei tambe ta kuminsá e peliger! Nan por keda eksponé na malesa. Nan mester di kuminda sólido (unda nan por haña esaki?). Nan mester keda deshasí di bichi i di pieu. Den e periodo aki tambe ta e periodo ku nan mester sosialisá: si nos ke pa nan bira mansu, nan mester tin hopi kontakto ku hende.

fb_img_1458002898931 (1)
Opservá un nèshi ku bo a haña promé. No kue bai kuné un bes.

Tep:
Ke men: no bai sin mas ku un nèshi ku bo a topa kualkier kaminda. Si bo ta duda si e mama ta presente? Keda vigilá e nèshi pa algun ora. Si despues di algun ora bo no ta nota ku e mama a bin bèk? Deliberá ku un organisashon ku ta alohá bestia si nan tin lugá pa e yunan di pushi. Bo por tuma den konsiderashon si bo mes tambe lo por hasi algu pa nan.
Vigilá e nèshi for di distansia grandi. Sí e mama por wak bo lo e tin miedu di bai bèk serka su yunan.
Sí ta posibel laga kuminda i awa den serkania di e nèshi pa e mama no tin nodi di bai muchu leu pa buska kuminda.
Den e kaso ku no tin un mama i bo a bai ku e yunan, nunka no duna nan lechi di baka! Lechi di kabritu si por. Pero mihó ta lechi pa yu di pushi. Esaki bo por kumpra kla kaba na bleki na “Petshop” òf puiru. Yu di pushi por deshidratá lihé, hopi bia denter di algun ora, sigur aki na Kòrsou. Yunan di pushi ku ta mas yòn ku 5 siman por deshidratá mas lihé ku esnan mas bieu. Pa bo por kontrolá si nan a deshidratá bo por kue e kueru ku kuidou den su nèk òf bo por hasi esaki tambe na su pianan di patras altura di su hep i his’é un tiki si bo mira ku e kueru no ta bai su lugá bèk i e ta keda pará bo por asumí ku e bestia a deshidratá.

Na Kòrsou no tin masha lugá ku ta alohá yunan di pushi. E posibilidatnan ku tin, mayoria bia ta na enkargo di boluntario, ta yen i ta difísil pa haña un kas permanente pa e yunan, ni maske kon dushi, lif i bunita nan ta.