Un kacho adulto nobo den kas, lokual ku bo mester sa

Na promé lugá, ta un kos tremendo ku bo a skohe pa duna un kachó un di 2 chèns! Nos ta konvensí ku lo bo ta bai tin un bon amigu ku ta fiel i gradesido na bo.Ku e foyeto aki nos ke duna bo informashon pa bo por krea e situashon perfekto pa e kolokashon logra. Bo kachó tin un pasado i no ta un pakete ku ta kla kaba. Un kachó ku a muda di un lugá pa otro mester di un promedio di 8 luna pa rekuperá i adaptá na su situashon nobo i pa e sintié kómodo na su kas nobo. Komo ku bo no tabata tin influensia riba su pasado lo bo por haña bo konfrontá ku komportashon no deseá ku el a siña na su kas anterior òf reakshonnan ku ta salí di su pasado.

Probablemente lo bo tin un kachó ehemplar durante e promé 2 simannan. E kachó ta insigur i no ta tribi di hasi òf demostrá kon e ta. Na e momento ku e ta poko mas kómodo den su situashon nobo e por kuminsá demonstrá komportashon problemátiko. Nos por kalma bo ku na un prinsipio tin un solushon pa tur komportashon indeseá.

E promé konseho ku nos lo ke duna bo di kurason ta, no tin nodi di aseptá mal komportashon òf laga esaki ta un motibu pa bolbe realoh’é. Hasi bo preguntanan na un di e skolnan di training pa kachó na Kòrsou. Lokual ku si nos ta pidi di bo ta…un tiki komprenshon i tempu pa bo kachó.

Tep: Si bo tin un pareha ta bon pa palabra adelantá kiko por i no por i ki komando boso ta bai hasi uzo di dje. Kualkier kos traha un lista di palabrashon pa asina boso tin klaridat tokante e palabrashonnan hasí. Buska informashon tokante e rasa òf e rasanan ku por a kasta ku otro i buska pa sa kiko ta e karakterístika di e rasa(nan) aki. Asina bo no ta haña bo konfrontá ku sierto komportashon ku ta típiko algu di e rasa konserní. Profundisá den e normanan di awendia den edukashon di un kachó. Wak bon kiko bo mester di material, kuminda, remedi i posibilidat di edukashon. Un bon preparashon ta hasi e trabou mas fásil.

Dia di mudansa:

Preferibel trata na buska bo amigu nobo promé ku mèrdia pa bin kas kuné. Asina bo kachó lo tin tempu henter dia pa eksplorá su ambiente nobo promé ku anochi sera. Duna bo kachó inmediatamente su mes lugá den outo, esaki ta bai mas fásil ora tur otro miembro di famia ta sintá kaba na nan lugá den outo. Sòru pa e tin sufisiente espasio i no but’é meimei di mucha (si esakinan ta presente). Kualkier kos mara e kachó den outo pa e no bula bin dilanti i bo tin ku korigié inmediatamente.

Duna e kachó espasio pa e por deskubrí tur kos nobo. Mihó pa kuminsá den kura i despues bai paden. Asina e chèns ku e por hasi su nesesidat paden ta bira mas chikí. Sòru pa un esfera trankil den bo kas i den bo famia. Ta importante pa sòru pa e promé kontakto ku mucha bai di un forma trankil. Duna e kachó e espasio pa e sera konosí di un manera trankil ku tur miembro di famia sin fòrs’é. Ora e promé eksitashon di tur dos banda baha un tiki, ta bon pa duna e kachó un kuki den bo planta di man. siña e muchanan ku e kachónan gusta pa bo karisia nan riba nan pechu en bes di riba nan kabes. siña bo yu ku no ta tur kachó gusta pa bo bras’é òf karg’é i duna e kachó su espasio pa e por kustumá ku mucha. siña bo yu tambe pa e sòru pa e ta mas haltu ku e kachó di estatura. Ke men no laga e mucha sinta abou, lastra òf gatia abou. Esaki no tin nada ke haber ku komportashon di ken ta dominá ken, esaki ta algu ku basta tempu pasá tur hende tabata pensa, pero mas bien e ta pa e seguridat. Movishon drùk òf diripiente e kachónan ta eksperensia komo algu ku ta duna nan miedu. Siña e kachó inmediatamente ku bo no ta aseptá ku e ta bula. Esaki bo por hasi dor di bira di banda i lag’é sin dun’é atenshon. Manera e ta ku tur 4 pata abou atrobe bo ta elogi’é dunando e bo atenshon.

Bishita lo tin ku warda te e siguiente dia òf algun dia despues ni maske kon ansioso nan ta pa konosé. Dikon? E kachó ta yen di strès i mester di tempu pa e adaptá.

Sòru pa e kachó tin su mes lugá den forma di un makutu pa kachó òf un deken. E lugá aki bo por hasié agradabel pa e kachó dor di dun’é un kos dushi einan. E lugá aki ta nifiká seguridat i ta dun’é stabilidat. Un kachó no tin mag di haña straf einan. E mester ta un lugá kaminda e kachó por alehá den tur trankilidat. Pa mucha e lugá aki mester ta un lugá prohibí.

Ta importante pa for di e di 2 dia ku e kachó ta serka bo pa kustum’é ku no ta tur ora bo ta na kas. Ke men ni maske bo a plania pa ta liber algun dia pa bo ta huntu ku bo bestia di kas nobo, bai for di kas tur dia maske ta un ratu. Lo bo ripara ku e promé dianan bo kachó lo drumi hopi esaki ta pa e bin bij di tur e impreshon nobo nan ku el a haña. Ta konosí ku kachónan ku a keda alohá pa un siguiente bia ta mas sensitivo pa desaroyá e angustia di ta so. siña e kachó ku no ta tur ora i tur kaminda e por sigui bo den kas. Trata na “lag’é su so” segun un sekuensia ku ta akumulá e oranan, no lag’é den un tiru su so pa 4 ora. Kada bes ku un mei ora/ un ora ta sufisiente.

Sera konosí ku otro kachó di famia:

Si bo bai buska e kachó nobo ku e kachó ku bo tabata tin kaba, lo ta rekomendabel pa apartá nan ora bo ta transportá nan. Bai na un lugá neutral ku nan pa nan sera konosí ku otro, un lugá ku pa tur dos ta deskonosí. Kana keiru un ratu ku nan i sòru pa e kachónan kana banda di otro en bes di laga nan topa otro kaminda nan ta para kara kara dilanti otro. Keiru un bon pida ku nan kaminda bo ta sòru pa nan drenta den kontakto ku otro di un manera gradual. Ora yega kas, laga nan tur dos kana den kura. Si bo tin mas kachó, lo ta mihó pa laga nan sera konosí un pa un, re introdusi nan kada un atrobe riba nan mes tereno. Promé ku e kachónan bai paden ta bon pa a warda tur kos ku por trese konflikto adelantá. Kuminda, awa, kos di hunga, wesu i makutu di kachó ta kosnan ku por trese konflikto serka e kachónan. Informashon mas amplio lo bo por haña den e kapítulo ku ta papia di ‘añadí un kachó den un grupo di kachó eksistente” (pero no keda sin lesa sobra di e página aki).

 

E promé dianan no laga nan so huntu i duna nan kuminda apart. Sea kouteloso na e momentonan di eksitashon manera ora bishita bin, ora di bai keiru, ora miembronan di famia yega kas, ora di prepará kuminda etc. Un iritashon chikí por resultá den bringamentu. Un grupo di kachó ta skohe e lider di e grupo, sin tene kuenta ken tabata t’ei promé òf ken ta esun mas bieu, lokual ku ta konta pa nan ta ken ta esun mentalmente mas fuerte i mas ambisioso. Na promé instansia esaki lo ta e kachó ku na e momentu ei e grupo aktual lo skohe, pero esaki ta algu ku por kambia den e promé simannan si resultá ku esun nobo ta mas fuerte. Trata na no influensia esaki nos komo hende no tin nada di bisa den esei, asina bo ta evitá bringamentu ku por dura pa un tempu largu. Sinembargo despues di estudio sientífiko no ta kere masha mas den e tèrmino lider di e grupo. Hende no ta kapabel pa tuma e ròl ei riba nan anto serka kachó mes e no ta algu tantu estrikto manera hende i siensia a kere na promé instante. kachónan tambe a resultá di ta biba den un relashon familiar ku otro sin un herarkia tantu estrikto.

Hasi nan nesesidat

Siña e kachó for di e promé dia unda bo ke pa e hasi su nesesidat. Asina bo ripara ku e kachó tin ku hasi su nesesidat bo ta hib’é na e kaminda ku bo a destiná pa esaki i ora e hasi su nesesidat bo ta elogi’é enormemente. Ora nan faya, no straf nan, solamente si bo nota ku e ta hasiendo su nesesidat miéntras bo ta mir’é hasié bo por bis’é hasiendo uzo di bo stèm “foei” despues bo ta hib’é kaminda bo ke pa e hasi su nesesidat. No frega bo kachó ku su nanishi den su sushi esaki no ta añadí nada na su training di hasi su sushi na e kaminda destiná. Úniko kos ku e ta siña ta ku su sushi i abo den kombinashon ku otro por ta algu hopi spantoso.

Straf bo kachó despues ku algu a sosodé kaba, no tin sentido. E kachó no ta konektá e straf ku e aksidente chikí ku e tabata tin muchu tempu a pasa kaba. Ora nan pishi ora nan bin kuminda bo òf ora bo straf nan, ta pishi ku ta demostrá ku nan ta sumiso na bo. Ku esaki e kachó ta demostrá di ta insigur den e situashon aki i e ta vulnerabel na e momento ei. E no ta kai bou di ku e no sa unda pa e hasi su nesesidat. Lo bo ripara si bo ta mas trankil ora bo kumind’é lo e pishi ménos na e momento ei.

Training

Kachó ta siña entre otro dor di konektá kos ku otro. Komportashon ku ta resultá den algu positivo nan lo sigui ripití, komportashon ku ta kondusí na algu negativo nan lo ripití ménos, a lo ménos si e no haña un rekompensa p’e tambe. Atenshon negativo tambe ta atenshon.

Bo mester realisá bo mes ku pa bo straf òf elogiá bo tin 2 sekònde di tempu. Si bo tarda mas ku 2 sekònde e kachó no por konektá e straf òf elogio mas ku su komportashon i e no tin sentido mas. Esaki ta konta den kada situashon di training. Kachó no ta komuniká den idioma di hende. Siña kos nobo ta manera e wega di friu òf kayente ku nos tabata hunga pa un kachó. Ora bo ke train e kachó lo bo tin ku hasi esaki tumando stap chikí pa e kachó por komprondé bo. Si akaso bo no sa kon pa bo siñ’é algu? Tin hopi manera kon pa siña algu ku guia. Wak pa bo ta minusioso ora bo ta buska un skol pa kachó. Un skol di kachó ku ta hasi uzo di formanan di koregí hasiendo uzo di aktitut dominante i teorianan ta un skol pa kachó ku no a invertí den formashon di su trahadónan segun e sistema moderno, i a keda para na e téknika ku tabata hasi uzo di dje 20 aña pasá.

Tep: Un kachó ta siña mihó di un training positivo. Sigur kachónan ku tin un pasado dudoso por reakshon di un manera insigur, miedoso i inesperá ora purba na koregí nan di mas. Nunka no traha kontra di bo sintimentu i sigui bo intuishon. Trata bo kachó manera bo mes lo ke pa trata bo, habrí, kontentu i di un manera honesto!

Rekompensa pa bon komportashon…trahamentu ku rekompensa hopi bia ta duna resistensia.”e ta hasié solamente pa e kos di kome i no pa mi” “rekompensa ta soborno” ta lokual ku generalmente hende ta pensa òf bisa. Ta un pensamentu romántiko ku e kachó ta traha pa bo so…Un kachó ta traha si e ta dun’é algu agradabel en kambio òf pa e evitá algu ménos agradabel. Hende tambe ta meskos, mi por splika esaki ku 2 ehèmpel:

Bo ta traha pa un kompania, e kondishonnan di e kompania ta bon, bo ta risibí un bon salario i e salario ta na ora semper. Bo mènedjer ta un persona agradabel, interesá den su trahadónan i ku regularidat e ta laga boso ripara ku e ta kontentu ku boso trabou. E ta duna kòmplimènt na bo i bo koleganan ku regularidat i tin posibilidat pa e duna bo bónus si bo hasi un bon trabou. Si tin kos ku no a kana bon e ta palabra esaki ku bo e no sa zundra hende dilanti otronan. E esfera di trabou ta agradabel, bo sa kiko nan ta deseá di bo i bo sa kiko bo por spera en kambio. Bo ta sinti bo bon den e sirkunstansianan aki, bo ta relahá i bo ta dispuesto na hasi mas ku nan ta deseá di bo.

Bo ta traha na un kompania, e esfera na trabou ta malu, kontinuamente tin zundramentu, ora fayo keda hasí nan ta zundra bo i duna bo falta di kos ku a bai robes. Bo salario ta abou i semper bo ta puntra bo mes si e bia aki si nan lo paga bo na tempu. Ni bónus ni kòmplimènt nan no konosé den e kultura di trabou aki. E último luna aki ni paga nan no a paga bo. Bo mènedjer ta un hende ku bo no sa kiko bo por spera di dje. Si e djis yega den bo besindario bo tin miedu pa kometé fayo i bo ta bira nervioso. Preferibel lo bo deseá un otro trabou, pero esaki no ta algu fásil. Bo ta traha si, pero no ku amor. Bo ta hasi lokual ku bo tin ku hasi, pero ku koutela. Semper bai ku e sintimentu di miedu ku algu lo bai robes. Ya tin algun tempu kaba ku bo no ta bai traha ku plaser i bo no ke hasi mas ku solamente bo trabou. Despues di e di 2 luna sin pago, bo ta buska otro trabou.

Tur hende por imaginá nan mes den e 2 ehèmpelnan ariba menshoná. E ora ei bo ta komprondé ku no ta tantu difísil pa skohe pa e rekompensa. Bo ta okupá bo mes na un manera agradabel, relahante ku siña bo kachó e komportashon deseá. Kisas nunka no por koregí? Kompolaga, pero preferibel mas tiki ku ta posibel. Si bo korigié, wak pa bo no koregí di mas i wak pa bo hasié di un manera honesto, ku un kachó por komprondé bo. Nos tin a maya di straf di un manera duru, muchu largu i muchu biaha. Un kachó no ta siña di esaki i ta haña miedu.

Kuminda

Duna bo kachó kuminda 2x pa dia na un lugá fiho. Komementu por bira un kompetensia si ta trata di mas kachó, kuminda ta poder. Laga e kachó na pas ora bo dun’é su kuminda. Despues di esaki bo tin tur tempu di mundu pa bo hasi training kuné di su baki kuminda por ehèmpel si bo nota ku bo kachó ta reakshoná masha fuerte riba kuminda i ta defendé su baki kuminda. Na promé instante no bai hiba un guera kuné, e konekshon entre abo i e kachó ainda no ta esun di mas fuerte i e kachó por reakshoná deskonfiá. Sigur si bo kachó den pasado tabata un kachó di kaya i mester a bringa pa yega na su kuminda. Pidi guia pa bo por yega na un training di e baki di kuminda. Un bon training di baki di kuminda ta enserá ku bo mester por duna e kachó mas kuminda i na un prinsipio ku bo por kita e baki di kuminda for di dje. Asina e kachó ta siña ku ta algu agradabel ku tin un hende den su besindario ora e ta kome i e agresividat lo disparsé. Ademas di esei ta algu masha normal si bo kachó kome su kuminda den un frega di wowo. No ta algu pa prekupá kuné.

img_7857
Drenta e kouchi de kacho pa duna kuminda

 

Si bo tin mas kachó, duna nan kuminda ku sufisiente distansia entre di nan òf buta nan kompletamente apart den un kamber òf den un kouchi. Asina bo ta krea trankilidat na ora di kome i bo ta evitá bringamentu. No laga un baki di kuminda para mas largu ku 15 minüt, tampoko ora bo tin 1 kachó so. E no a kome? No ta nada, anochi e tin otro chèns pa kome. Dun’é un porshon normal, nada èkstra, esaki ta evitá ku bo ta krea un kachó ku ta ferfelu pa kome. Awa e mester tin na su disposishon semper. Pa bo kachó su bienestar korporal ta masha malu si e no tin akseso na awa. Realisá bo mes ku sierto kuminda i wesu por okashoná konflikto ora ta trata di mas kachó.

Algu ku bo ta topa hopi serka kachó (di kaya) ta hòrtamentu di otro su kuminda. E ta un komportashon no deseá, pero e ta un komportashon natural. Den un grupo di kachó ta konta ku kiko ku e otro laga para e siguiente tin mag di kome. Esaki ta konta tambe pa e kosnan riba mesa, e karni riba aanrecht òf bo kuminda ku bo a pone un ratu un banda pa bo bai kue algu for di den kushina. Bo mester aseptá sin mas ku e ta hòrta? No, di mes ku no. Pero e ta kuminsá na evitá ku e por kometé fayo i tambe ku siñ’é kon pa e atendé ora di kome. Kiko ta su lugá ora boso ta sinta kome, den otro situashon bo ta permitié pa e para kantu di aanrecht? Bo ta permitié pa e bin sinta pidi kuminda miéntras bo ta na mesa sintá ta kome, anto sa dun’é algu na e momentunan ku bo mira e wowonan maron inosente nan ei ta roga bo pa kuminda? Sea kla i mantené bo mes na bo reglanan stipulá. Pero realisá bo mes si ku un kachó ta un bestia ku instinto, algu ku ta riba aanrecht sin mas ta manera el a gana wega di number. Evitá ku e por yega serka. Una bes ku el a logra un bia, lo e trata semper pa wak ku e por bolbe kai den premio. I sea honesto, si ta abo lo bo no hasi meskos si kontinuamente bo topa un papel di 100 florin den kushina? Sigur un kachó ku tabata biba riba kaya i ku a konosé hamber, lo no laga un kuminda para sin mas, pasobra bo no por sa nunka ki dia e por bolbe kome, esei ta bringa kontra di instinto.

Agresividat i Angustia

Angustia i agresividat ta e komportashon ku ta esunnan di mas pidí ora di buska yudansa. Por tin hopi diferente motibu pa kiko bo kachó ta bira agresivo òf pa e tin miedu. Pa por solushoná e kos aki ta bon pa sa di unda e miedu òf agresividat a sali. Kiko a sosodé promé ku e kachó pa su komportashon a bòltu bira miedu òf agresivo? Ta masha tiki sa sosodé ku un kachó ta reakshoná di gòlpi ku agresividat mayoria bia e kachó ta indiká ku e no ta gusta e situashon aktual. Solamente nos no a rekonosé e señalnan ku e tabata duna. Siña konosé bo kachó i wak kiko e ta indiká ku su kurpa i respetá su bareranan. Hopi bia nos no ta respetá su barera i subi su tereno ku e úniko salbashon ku e ta mira ta dor di skohe pa agresividat.

Lo no ta posibel pa duna un splikashon aworakí den korto ta kon ta solushoná e problema aki. Nos ke rekomendá e ora ei tambe, lokual ku ta di sumo importansia, pa buska yudansa serka un hende ku ta un profeshonal den e komportashon di kachó pa e por yuda bo. Agresividat i miedu no ta algu ku bo por solushoná djis dor di bai un kurso pero e ta eksihí un manera di kondusí spesífiko individual. Ni maske e situashon ta pidi pa un manera spesífiko di atendé kuné esaki no ta nifiká ku no tin un solushon p’e. Tin hopi kos ku por keda solushoná i tambe hopi kos di koregí. I mi ta riska garantisá bo ku den 99% di e kasonan di agresividat tin ke haber ku inseguridat/miedu. Kontal ku e orígen ta salí di esaki. Hopi hende ta bisa ku ta problema ku komportashon dominante pero esaki APENAS ta e kaso.

No trata na solushoná agresividat ku agresividat, akshon ta duna reakshon, e komportashon indeseá lo oumentá. Un kachó ku sintié changa lo hasi kos straño pa sali for di e situashon aki.

Kachónan ku miedu tambe por demostrá komportashon agresivo a base di nan miedu. Si bo atendé ku man duru e komportashon lo bira pió i lo e haña mas miedu. Ta importante pa atendé ku e miedu for di su orígen pa kit’é.

Den tur dos kaso nos ta rekomendá pa buska yudansa mas pronto ku ta posibel, ménos tempu e tin ku e komportashon indeseá aki, mas lihé e por keda solushoná.

Pa loke ta trata e salú

Pa bo tene bo kachó salú tin algun kos ku ta bin bèk ku regularidat. Nos ta duna bo aki un resúmen chikí pa prevení un ke otro. Bo veterinario por duna bo informashon amplio tokante tur aspekto médiko.

Pa mantené bo kachó liber di pruga òf karpata ta importante pa trat’é ku regularidat ku un produkto kontra di pruga i karpata. Esaki ta algu ku tin ku hasi na un promedio di un bia pa luna. Esaki ta dependé di e marka i e tipo di produkto ku ta hasi uzo di dje pa kombatí e bestianan aki. Ni maske bo trat’é bon, ta bon pa kontrolé tur dia si e tin karpata. No dof e karpata, pero rank’é sak’é den un tiru. Tin bia lo bo tin ku tene e karpata, bir’é media buèlta i rank’é pa los e. No lubidá di kontrolá meimei di e tenchinan i na su plant’i pia. Bo kachó por bira hopi malu di un mordé di karpata. Tratamentu di e malesa di karpata (Ehrlichia) ta pisá i hopi bia e kachónan no ta sobrebibí e malesa. Prevení ta mihó ku kombatí. Realisá bo mes ku si bo kachó tin pieu lo e tin bichi tambe. Ke men sòru pa tratamentu di pieu i bichi pareu. Informashon amplio bo ta haña riba e página pieu, karpata, bichi i otro bestia.

Lokual ku tambe nos ke hala bo atenshon riba dje ta bichi. En espesial e bichi di kurason. Palabrá ku e veterinario kiko ta e mihó prevenshon pa bo kachó kontra di bichi di kurason. Bichi di kurason ta un problema grandi aki pa esaki tambe ta konta ku e tratamentu ta un ku hopi riesgo. E proverbio:” Prevení ta mihó ku kombatí” ta konta aki tambe. Pa e otro tiponan di bichi den e sistema di tripa ta importante pa deshasí di nan algun bia pa aña. Puntra bo veterinario konseho.

Tur aña tin ku pasa bo kachó angua. Si bo ta kuminsá ku un yu di kachó, e ora ei den komienso mester bakun’é mas bia. Semper ta bon pa puntra e veterinario ki tipo di bakuna el a haña i ki dia mester ripití.

Pa e kondishon di kueru di bo kachó ta mihó pa no baña bo kachó muchu bia. Na un prinsipio no mas bia ku 2x pa aña. Ora e kachó kaba di landa den laman semper mester spul’é ku awa di kranchi.

Tep: Si bo ripara ku bo kachó ta mustra malu, no warda muchu ora bo ta duda semper tuma kontakto ku bo veterinario.

©Rescueracao/ Behave translation Denice Bezemer