E kachó muhé di dèk

E por sosodé ku bo ta haña bo tin ku alohá un kachó muhé di dèk. Te ku nan di 4 siman promé ku nan duna lus por abortá ainda. Si bo hasi un bishita na bo veterinario lo bo por palabra un ke otro kuné, sigur na Kòrsou kaminda tin demasiado kachó, e ta sigur algu ku ta bal la pena. Un nèshi di kachó no deseá por keda evitá asina. Si akaso e kachó su estado ta muchu avansá kaba i no por abortá e yunan e ora ei tin algun kos ku ta sumamente importante pa bo sa.

Meexy na estado den un fase hopi avansa. bo por sinti e yunan move

Kachónan di dèk mester di mas kuminda ku esnan ku no ta na estado. E yunan tin ku krese i nan tin ku hasi uzo di e kuminda di nan mama. Ni maske e mama no ta haña sufisiente kuminda e yunan ta hasi uzo di dje. Pa sòru pa e mama keda salú/ òf pa gan’é salú bèk e mester kome algun bia pa dia. 3- 4 bia un porshon no ta nada straño. Bo por disidí tambe di sòru pa e tin kuminda kontinuamente na su alkanse. Esaki ta nifiká ku su baki di kuminda tin kuminda kontinuamente den dje pa asina e por kome ora e ta sinti e nesesidat di kome. Serka kachónan ku a pasa un temporada di hamber bo tin ku paga tinu pa nan no kome di mas pasobra nan tin hamber i ku nan por haña problema ku nan stoma konsekuentemente. Ta rekomendabel pa duna un kachó na estado kuminda di kachó chikí pa motibu ku esaki ta kontené mas nutriente i e ta mas fásil pa digerí.

Sòru pa e kachó tin un lugá trankil pa e por duna lus. Un lugá kaminda no por bin otro kachó. Sòru pa e ambiente ta mas limpi ku ta posibel. Mi mes semper tin ku hari pa e último aki mirando ku na Kòrsou e kachónan ta duna lus na e lugánan di mas pekuliar ku tin anto mayoria bia tur kos ta bai bon. Pero mas limpi e besindario, ménos chèns bo tin pa infekshon serka e mama i e yunan.

Meex den su kamber di parto trankil, rondona ku un waya pa seguridat i pa evita bishita indesea

Na un prinsipio bo por spera e parto a korto plaso despues ku e temperatura di e mama a baha. Mayoria bia e no ta dura mas largu ku mitar dia òf un dia despues. Mi a laga e mama mes hasi su parto e mes por hasi tur kos por kompleto. Mi no a dun’é asistensia ni pa limpia e yunan, ni pa kòrta e lombrishi ni mi no a buta e yunan na e mama su pechunan. Meexy (e mama riba e potrètnan) mes a hasi tur kos asina bon ku sí mi a bai yud’é ta stroba lo mi a strob’é. Un kos sí, mi a sòru pa mi tabata kontinuamente huntu kuné, mi a ofresé awa i mi a apoy’é ku stèm abou. Importante ta pa bo mes tambe prepará bo mes pa e parto. Lesa mas tantu ku ta posibel informashon tokante esaki pa bo sa kiko ta spera bo, wak pa bo ta na altura por ehèmpel di e tempu ku mester tin entre di kada yu ku nase. Wak pa bo a hasi e veterinario tur pregunta ku ta posibel i pa bo sa ken bo por yama si akaso algu bai robes. Un site ku hopi informashon útil tokante di e aspektonan médiko ora ta trata di un parto ta esun di e klínika veterinario Sleeuwijk òf Klaver4dieren. Algu otro ku ta hopi útil ta e kalènder di e desaroyo di e yunan den barika di mama, bo por mira tur dia kon e yunan ta desaroyá. Pero si bo tuma tempu i sinta un anochi i buska informashon riba Internet lo bo logra sigur. Tin asina tantu informashon tokante di kachónan na estado i nan parto ku ta mustra mi algu sin nodi pa mi añadí mas informashon tokante di esaki.

Kachónan ku a kaba di wèrp por reakshoná di un manera distinto for di lokual ku bo a kustumá kuné riba hende i otro bestia. No ta algu straño ku nan ke defendé nan yunan kontra di intruso i nan lo reakshoná agresivo tambe kontra di e otro kachónan ku ta pertenesé na bo kas. Tin ora ta manera ta e leon a spièrta den dje i abo komo esun ku ta duna kuido tambe mester ta kouteloso.

Nan a nase, tur 8 ta salú

Mayoria bia nos komo dunadó di kuido si por aserka e yunan sin problema. Tin bia den komienso e ta kosta un tiki mas esfuerso i bo mester aserka ku koutela i pasenshi i miéntras bo keda trankil lo bo logra. Duna mama i yunan nan sosiegu, limpiesa i òrdu. Evitá ku tur hende por yega serka e yunan i tambe no laga otro hende kue nan abo so komo esun ku ta kuida nan por hasi esaki. E yunan no ta ko’i hunga i nan mester drumi, drumi hopi. Si kue nan muchu nan ta bira kachó di strès. Si bo wak e bon ta sufisiente sí bo hisa nan 1 bia pa dia so, djis pa pisa nan.

Bo por pisa e yunan na komienso pa bo por wak si nan ta krese sufisiente. Miéntras tur dia nan krese ta bon. Mayoria bia e promé dianan e mama no ta kita for di banda di su yunan i nan lo haña sufisiente lechi. Bo por chek e pechu si e tin sufisiente lechi dor di primi suavemente den dje. Si Sali un gota di lechi e tin lechi. Esaki tambe ta algu ku ta tuma su tempu pa e kuminsá kore ke men no spanta si no tin hopi lechi. Laga naturalesa kana su kurso i no bula kue e bòter pa bo duna nan lechi adishonal. Tene kontakto ku bo veterinario si bo tin e idea ku e no tin sufisiente lechi. E por dun’é por ehèmpel angua pa stimulá e produkshon di lechi. Si akaso bo tin ku duna tòg lechi aserka? Kue esunnan ku ta mas gordo i duna nan lechi na bòter i laga esnan mas chikí pa e mama mes hasi pa asina e haña chèns di bebe trankil serka e mama. Asina e lechi di mama ta keda pa esnan mas vulnerabel ku tin mas mester di dje. Kualkier kos yuda e chikínan ki ora nan tin ku bebe serka e mama, pone nan na e pechu di e mama pa asina nan por bebe trankil. Hopi bia e chikínan aki no tin hopi forsa pa nan por bringa kontra di esnan mas gordo ku ta pusha nan kita for di e pechu . Si bo duna esunnan mas gordo lechi e no tin tantu purá mas i ta duna chèns na e otronan pa nan yega na e mama su pechu. Pero un bes mas solamente si ta nesesario ta duna nan lechi adishonal.

Mama i esun di mas chiki di e neshi

No keda strañá si e mama laga e yunan pa un temporada nan so. Tin e tipo di mama ku gusta kuida i tin otro ku ta bin djis pa duna e yunan lechi. No obligá e mama di bai duna nan lechi. Esta no bai mara nan, tene nan abou òf wanta nan abou. No hasi e kos ei. E mama sa muchu bon ki ora su yu tin ku bebe i e no ta kèns. Bo por hib’é serka e yunan si komo un manera di kord’e ku e yunan tin ku bebe pero por general e mes ta regla su asuntu bon bon. Tin ora bo ta nota serka e mamanan hopi yòn problema den e sentido aki. En realidat nan ta muchu yòn pa ta mama kaba i nan no sa bon kiko pa nan hasi ku tur e yunan ku ta hasi bochincha rondó di nan. Pero al final tur kos ta regla su mes i lo e resultá bon. Si bo pisa e yunan bo por kontrolá si nan ta krese.

Ora e yunan bira un tiki mas grandi lo bo ripara ku e mama ta skohe konsientemente pa laga nan so pa un tempu mas largu. Asina e ta siña nan kon pa nan atendé ku frustrashon. Ora e yunan ke purba bebe e por rabia ku nan i stroba nan di bebe. Esaki ta un proseso natural ku e ta purba deskustumá nan di bebe di pechu. Mayoria bia esaki ta sosodé ora e yunan tin 5- 6 siman. No ta asina ku e mama a fada di su yunan i ku konsekuentemente por kita nan numa di e mama. Esaki ta e fayo di mas grandi ku hende ta kometé. E rabiamentu ta algu ku tin ku sosodé. E ta preparando su yunan kon pa atendé ku frustrashon. Tin bia e korekshonnan no ta nèchi pa mira, pero e komo mama sa eksaktamente kon pa e koregí su yunan. E sa mihó ku nos komo hende kon i ki ora pa hasié. Pues no mete kuné. Pa mas informashon tokante esaki por wak na e kapítulo tokante di bandoná e nèshi promé ku ora. Tin splikashon tokante e desaroyo di e sistema di nervio i tambe tokante di e desaroyo emoshonal ku ta importante pa e yunan keda serka otro te ora nan kumpli 8 siman.

E yunan di kachó ta bai serka otro doño

E yunan ora nan kumpli 6 siman

8 siman, e dia a yega. Si tur kos a bai segun deseo tin hopi doño nobo i e yunan di kachó por muda. Laga e doñonan nobo bin for di mainta pa bin buska e yunan di kachó, asina e yu di kachó tin henter dia pa e adaptá na su situashon nobo, esaki ta duna nan mas sosiegu promé ku nan tin ku bai pasa anochi. Duna nan e buki di ènter i algu di nan mes kuminda. Preferibel laga nan duna nan e mesun marka di kuminda ku nan a kustumá kuné den komienso i den su nèshi. Dor di e mudansa e resistensia por baha i bo ke evitá habrimentu di barika. Bisa bon kla ki dia e tin ku haña tratamentu kontra di bichi i ki dia e tin ku bolbe bai pasa angua. Laga e yunan di kachó bai un tiki repartí for di otro. Esta kada dia algun pa e mama no keda den un tiru sin su yunan. Esaki ta fasilitá kos tambe pa esun ku a duna nan kuido ;). Duna e mama den e temporada ei hopi kos di hasi pa kita su mente for di e yunan. Kachó muhé tambe por sinti falta di nan yunan pero ku desviashon di su mente i hungamentu mayoria bia bo por evitá esaki. Kòrda tambe ku gradualmente bo por mengua su kuminda. E no mester di dje tantu ei mas. Anto no lubidá… traha un sita ku e veterinario pa plania pa sterilis’é. Sera e fábrika ei, pasobra djis despues ku nan yunan a bai nan por bolbe Sali na estado si bo no paga bon tinu.

©Rescueracao 2022

Nos no ke kita bo di mira e grabashon di dia Meexy a duna lus na su yunan

E nasementu di un yu di kachó

E nasementu di un yu di kachó, morde e lombrishi

E nasementu di un yu di kachó,e plasenta