Yu di kachó i bandonamentu di e nèshi promé ku ora

Nos ta mira hopi yunan di kachó ku a bandoná e nèshi muchu trempan. Kiko ta trempan, esaki ta algu di sano huisio? I mas importante ainda pa sa ta e dikon mester a bandoná e nèshi trempan.

Yu di kachó chikí ta masha dushi i asina cute, ku preferibel nos lo ke tene nan kontinuamente serka di nos. Pero ta algu di sano huisio pa bo saka un yu di kachó promé ku e tin 8 siman for di su nèshi?

En realidat e kontesta ta no. Hopi bia bo ta tende, si pero nos tabata intenshoná pa buska e yu di kachó ku su 8 siman pero e doño a yama bisa pa bin busk’é ku su 6 siman pasobra e mama ta fadá di nan. Òf nos a hañ’é, nan ta kere ku lo e tin 3 siman.

Durante e simannan ku e kachó ta pasa den e nèshi ta di suma importansia pa un desaroyo sano pa e kachó. I físikamente i mentalmente nan tin e nesesidat di tempu pa nan por prepará nan mes pa nan por bai eksplorá i biba den e mundu eifó.

Den e promé simannan despues di nan nasementu ta masha hopi kos ta pasa pa loke ta trata e desaroyo di e yu di kachó. Pa tur hende ya ta konosí e fase nan di bebe, drumi, wowonan i oreanan ku ta habri etcetera. E stapnan ku físikamente e yu di kachó ta pasa aden. Pero tin ménos atenshon pa e desaroyo emoshonal i di e fase ku nan ta pasa aden durante e periodo ku nan ta den nèshi.

Durante e promé simannan sosiegu i òrdu ta hopi importante. Mama ta kuida nan i komo hende bo ta presente wèl, pero bo ta vigilá tur kos di un distansia. Si tur kos ta bai segun deseo e mama mes ta regla tur kos i abo pa djis wak si tur kos ta bon 1 te 2 bia pa dia vigilá wak si e yunan ta gana peso i si nan ta bon di salú. Un yu di kachó ta eksperensia e kargamentu komo algu ku ta dun’é un tiki strès, pero komo ku esaki ta sosodé solamente 1 te 2 bia pa dia e no ta hasié daño. Durante e simannan aki esei ta sufisiente. Evitá di karganan muchu sea dor di bo mes òf dor di bo bishita òf muchanan den besindario ni maske kon atraktivo e kos aki ta, e yunan di kachó ta hopi vulnerabel na e momento ei i nan por keda infektá pa bakteria fásil. Anto, lokual ku tambe ta importante, nan ta haña muchu estímulo. Te na final di e di 3 siman, komienso di e di 4 siman por hasi esaki. For di estudio a resultá ku kontakto ku hende ta duna un efekto deseá bou di kondishon ku esaki ta limitá.

Te ku e di 7 siman nan sistema nervioso ta den desaroyo. Un palabra difísil pa esaki ta “myelinisashon” di e sistema di nervio. Tin un proseso ta tuma lugá ku e sistema di nervio ta kaba di desaroyá i e impulsonan ku nan ta risibí por keda trasladá den informashon útil pa nan prosesá. Mylline ta un supstansia vèt ku ta yuda ku e spit di traslado di informashon i ademas di esei e ta sòru pa informashon no bai pa otro parti di e nervionan kaminda e no mester ta.

For di estudio ta resultá ku e proseso aki ta tuma lugá solamente si nan desaroyá den grupo, esei ta nifiká den presensia di mama i rumannan. Si saka e yu di kachó muchu trempan for di su nèshi bo ta para e proseso aki i e konsekuensianan por ta grandi. E lugánan kaminda e proseso aki no por a keda finalisá ta yena ku otro materia (bindweefsel) ku ta duna señal robes òf no ta duna señal mes. Lokual ku bo ta mira hopi bia ta ku e yunan di kachónan aki ta desaroyá normal te ora nan tin 8 luna, nan periodo di pubertat nan ta desaroyá normal, pero despues nan por bira sumamente agresivo (òf miedoso). De fakto bo por bisa ku e no por prosesá e informashon ku e ta haña i konsekuentemente e ta reakshoná prinsipalmente di un manera agresivo. Pero kiko nos ta nota di komportashon desviá? Nan por desaroyá un angustia eksagerá pa hende, opheto òf situashon. Esaki por bai kompaña ku un agresividat enorme. E kachónan aki tin problema pa adaptá (rekuperá) i nan no por inkalkula situashon nan bon. Por ehèmpel bishita òf hende straño e ta risibí nan ku hopi agresividat òf miedu, e ta tuma hopi tempu promé ku e rekonosé hende òf pa e trankilisá den sierto situashon. Bishita ku lanta bai tualèt un ratu ora e regresá ta keda aserka atrobe ku e mesun agresividat. Ta manera kos ku nan no por adaptá na e situashon ku ta surgi. Mi a topa kachó ku ta reakshoná asina ku bishita pero tambe ku miembro di famia ku ta kana rònt den kas sukú òf ku a kana bai ariba den karson kòrtiku e regresá ku karson largu bistí. Kachónan ku ta aserka yen agresividat kla pa morde anto di aya banda ta hasi bashí nan glándula anal di angustia. Kachónan ku porfin a kalma pero den korto tempu ta bolbe bira di remate pasobra a hala un stul òf despues ku un hende a bai bishita baño. Kachónan ku ta sumamente angustiá pasobra bientu a supla òf algun blachi di palu a waya. Tur esaki ta indikashon di kachó ku a keda saka promé ku ora for di su nèshi. Mi no ta pretendé aki ku tur kachó ku a keda saká promé ku ora for di nan nèshi a desaroyá asina, danki Dios no, pero nos ta mira hopi bia si komportashon otro for di normal serka kachónan ku a keda saká promé ku ora for di nan nèshi. Esaki ta mas e kaso serka yunan di kachó ku a Sali for di e nèshi ku 8 siman. Esaki so kaba mester ta indikativo pa mantené nan huntu. Esaki ta kondusí na un yu di kachó emoshonalmente stabil.

Pero e komportashon aki ta algu ku ta indikativo pa un sistema di nervio ku no ta bon desaroyá? E chèns ku esaki ta e kaso ta hopi grandi a resultá despues di estudio. Di mes por tin otro faktor ku a hunga un ròl den esaki pero abo mester por duna nan e mihó komienso ku por ta posibel dor di mantené nan dushi huntu durante nan promé 8 siman di bida. Pa e motibu aki tambe mi no ta pro pa repartí e yunan di kachó una bes ku nan a pèrdè nan mama. Di mes e kantidat di trabou pa un famia ku ta duna nan kuido ta ménos ora bo tin ku kuida solamente 2-3 yu di kachó pero nos no tin bista ki efekto esaki tin riba e kachónan. Pa e motibu aki ami semper a tuma e nèshi den su totalidat pa mi kuida i nunka 1 òf 2 so si mi sa ku tin mas ruman. Tur esnan ku tabata so i ku mi a kuida a bira kachónan un poko straño. Esun mas pió ku e otro pero straño nan ta sigur J. E mayoria di e kachónan straño nan aki a bai i bolbe bin bèk i a keda serka mi.

Pero ta sosodé mas kos durante e temporada aki. Ora nan tin 5- 6 siman e mama ta bai kuminsá kustumá nan sin lechi di mama, e ta kuminsá gradualmente ta nenga nan di bebe serka dje. Kada bes e ta nenga nan mas i siña nan asina pa nan kustumá di kome kuminda sólido. Esaki ta di suma importansia pa nan desaroyo. E yu ta siña kon pa e atendé ku strès i tambe e ta siña konosé barera. E aktuashon di e mama ta wòrdu hopi bia interpretá robes komo si fuera e mama a “fada di su yunan”. Kon pa atendé ku strès i sa ku tin barera den su bida ta determinante pa e yu di kachó su formashon i desaroyo den bida. Un kachó ku no por atendé ku kambio den su bida semper lo tin strès i miedu. Nos komo hende nunka no por igualá e ròl di mama ei.

Mama ta siña nan hunga i ainda mas importante, siña nan sa límite den hungamentu i mordementu. E ta siña e yunan kon pa aseptá korekshon na un manera korekto. E wega di e yunan di kachó por ta hopi brutu tin ora pero asin’ei tambe nan ta siña konosé otro su límite. Mama ta tuma kada bes un tiki mas distansia di e yunan i ta siña nan ku mundu no ta kaba pa nan si e no t’ei. E bebementu di lechi ta bira un evenementu sosial i kada bes e ta bira ménos un manera di satisfasé hamber. Lokual ku mi ta haña bunita di mira ta ku e yu chocho mayoria bia na edat basta avansá ainda tin mag di bebe lechi di un manera sosial en komparashon ku sobra. Esaki tambe lo tin su motibu pa loke ta trata su desaroyo mi ta kere.

Den desaroyo di un nèshi di yu di kachó nada no ta sosodé sin ku e tin un motibu. Ora nan a yega na fin di nan di 7 siman i komienso di 8 siman nan ta kla pa nan bai nan lugá. promé ku e tempu ei no ta bon pa saka nan for di nan nèshi. Di mes ku e sosialisashon den un kas, ku hende i otro faktor den besindario ta importante. Un yu di kachó lantá sin stimulashon di otro kos ta lanta komo un kachó tímido. Esaki no ta algu ku mester lubidá. Pero mi ta konvensí ku por evitá hopi problema di komportashon si nos mantené nos mes na tur e kondishonnan ku ta mará na edukashon di e yu di kachó. Esaki ta nifiká ku tin ku kumpli ku e kondishonnan di sosialisashon i tambe na e kondishonnan di lanta den un grupo i tur proseso ku esaki ta bin kuné. ​

©Rescueracao 2020