Ai Dios bo a haña un puitu. Masha grasioso, pero kiko awor? Puitu di tur dos nos a yega di tin den kas. Anto pa bo kria un no ta difísil. Solamente bo tin ku tene kuenta ku algun kos.
Sòru pa bo tin un parti será kaminda e otro bestianan no por yega. Esaki por masha bon den dia den bo kura solamente bo mester sòru pa nan tin:

img_4600
1 dia bieu

Akseso na sombra. Hinka nan tur anochi paden. Djaka gusta kome puitu i nan ta yag riba nan. Pone un butishi kayente anochi serka e puitunan. Mi tabata buta nan anochi den un kouchi di kachó ku un butishi kayente lora den sèrbètè. E puitunan tabata bai drumi riba e butishi. Mi tabata tapa e puitunan ku un sèrbètè. Asina nan tabata sinti komo si fuera nan ta dushi drumi bou di nan mama. Un kos si bo tin ku paga tinu ta ku e puitunan mester por baha for di e butishi si nan ta deseá esei, sino e ta bira muchu kayente pa nan.

Kuminda

E promé dianan ku mi tabata tin e puitunan mi no tabata sa ki kuminda mi mester duna nan. E puitunan di galiña mi tabata duna e promé dianan aros kushiná, i despues di tempu mi tabata duna nan kuminda di galiña mulá/ ariña pa puitu. E puitunan di patu mi tabata duna un papa di Growena, kuminda di galiña,ku mi a laga muha den awa. Tin dia mi tabata duna e puitunan di galiña bichi, ku mi tabata saka for di kos di sushi (kliko) 😉 ku nan tabata gusta un mundu.

img_4956
Den dia bo ta duna nan pafó, anochi paden

Growena kuminda pa galiña bo por kumpra kasi den tur supermerkado (sigur na Vreugdenhill i Mangusa), ariña pa puitu mi tabata kumpra na “De Dommelse Watermolen”. Si e puitu ta hopi suak, e ora ei kalor i líkido ta masha importante. Poné un butishi banda di dje i traha awa ku suku p’e. Esaki bo por dun’é ku un pipèt òf un angua (sin e angua n’e) i dun’é tiki tiki, gota pa gota na su boka. Si e puitu gana un tiki forsa bo por dun’é kuminda líkido. Brua e ariña pa puitu ku awa òf buska papa pa yu di lora na “petshop”. Esaki bo por laga kore drenta ku hopi koutela den su boka. Tene masha kuidou si pa e no stek òf pa e no haña di mas. Realisá bo mes ku e stoma di un puitu ta masha chikí e no ta mas grandi ku e tòp di bo pink.

063
Landamentu den e baki di laba tayo

Yu di patu i landamentu. Nan gusta landa un mundu i ta hopi leuk pa hasi. Un baki di laba tayo mes ta sufisiente pa e chikínan. Sòru pa bo tin por ehèmpel un piedra den e baki pa asina nan por sosegá ora nan kansa. Keda serka nan. E yunan di patu tin bia bo tin ku duna nan un man pa nan por produsí e vèt ku nan tin riba nan plumanan. E glándula ku ta produsí e vèt ta na final di nan lomba, i komienso di e rabu. Si bo kishiki’é un tiki ku bo dede e patu mes ta bai laba su kurpa. Asina e ta repartí e vèt riba su plumanan pa e no muha ora e ta landa. Para muhá? No ta bon, probablemente ta trata di un para malu òf kansá.

Nos galiña a bira un galiña masha mansu. E tabata gusta sinta riba nos skouder. Galiña ta bestia masha sabí. Galiña tambe bo por train ku e clicker i ku training ku opheto. Nan ta gusta! Patu probablemente tambe solamente mi no a purba nunka ku nan.

0542
Mi tambe ke kalor i mi tambe ta sinti nesesidat di kompania agradabel.

©Rescueracao, translation Denice Bezemer.

Like us @ Facebook

Advertenties