Na Kòrsou bo por topa tur sorto di kos. Asina tambe morkoi i yuana. Tin bia nan tambe mester di yudansa.

098
Toontje ku mi a haña miéntras mi tabata limpia kura

Morkoi, tin 2 tipo di morkoi ku bo por topa en general na Kòrsou. E “kolenbrander schildpad” (Turtuga ku pata kòrá) ku ta un morkoi di tera. Anto e morkoi banda di kara kòrá/òf hel, un morkoi di awa. Kada un mester di un otro tipo di kuido. Di mes tin mas tipo di turtuga di laman na Kòrsou, pero eseinan lo bo no topa den bo kaminda pa loke ta trata e reskate di bestia. Si akaso bo topa bo ku un tòg lo mi tuma kontakto ku Carmabi.

E “kolenbrander”, ta un morkoi di tera. Mi tabata kumpra kuminda di lora seku Mazuri (e ta optenibel na Animal party na Caracasbaaiweg i tambe e depósito grandi di bestia tras di e pòmp di gasolin na Cas Coraweg) ku mi tabata laga bira moli den awa pa nan. Banda di e kuminda aki mi tabata duna nan fruta i berdura kòrta fresku. No duna nan muchu tomati pasobra esaki ta saka líkido for di nan kurpa i tampoko muchu blachi salada pasobra e tin muchu nitraat (un kímiko) riba dje. No duna nan fruta di e famia di apelsina, esei ta hasi nan hopi malu. Si bo no tin nada den kas e promé dia i bo ke duna nan algu di kome tòg bo por duna nan kuminda di kachó seku ku bo a laga para freska den awa. Preferibel no duna nan kuminda di pushi pa motibu ku e tin muchu salu den dje. Paga bon tinu ku ladron, morkoi yòn ta algu ku otro bestia gusta kome ke men hinka nan paden anochi. E tipo di morkoi aki tambe ta gusta awa, i pa nan baña aden i pa nan bebe. Pero nunka nan no ta keda largu den awa. Kuidou, un morkoi ku resultá riba su lomba, no por bira su mes pa e lanta. Morkoinan ta bestianan ku gusta subi bai laria i nan por koba masha bon tambe si bo no ke pèrdè nan sòru pa bo kura ta bon será. Nos tabata tin un baki di palu traha na un altura di 2 planki, nan no por a hui for di dje. Un site ku ta útil pa wak riba dje ta esun di Lacerta, ni maske su manera di alohá e bestianan aki ta dirigí riba un klima mas friu, aki nan por biba gewon pafó sin niun lampi.

dsc_2756
Toon & Lola, 2 kolenbranders (turtuga pata kòrá) yòn

E morkoi ku banda di kara kòrá/hel, ta un morkoi di awa, pues un turtuga. Importante ta pa ora bo haña nan pa nan tin akseso na awa. Yena un baki ku awa i buta nan aden, pero sòru si ku nan por Sali afó ora nan ta deseá esei. Nan ta kome sobra di bestia morto esaki ta nifiká ku nan ta gusta karni mashá. Si bo a kaba di hañ’é bo por dun’é kuminda seku di kachó ku a para bira moli den awa òf kuminda di pushi di bleki. Semper sòru pa bo duna nan awa. Un site di informashon masha útil ta esun di LICG. Aki bo lo topa hopi informashon tokante nutrishon, alokashon i kuido. Tambe dirigí riba e krio di morkoi den un klima mas friu pero e parti ei bo por laga afó numa, ta parse mi.

Roodwangschildpad; Trachemys scripta elegans; The Red-eared Slider
E morkoi ku banda di kara kòrá (turtuga)

Paga tinu, un morkoi heridá semper mester di yudansa! Un herida na un morkoi semper tin peliger pa e infektá. Turtuga (morkoi di awa) apsolutamente no tin mag di bai den awa i mester haña antibiótika. Veterinario Doest lo por yuda bo masha bon mes den un kaso asina. Si akaso bo tin kachó, tene masha kuidou ku nan..kachó ta mira morkoi komo kos di hunga, e morkoi por resultá hopi heridá asina.

 

dsc02972
Tico a bin komo stowe (stowaway) i a resultá den un shokes di un pakus, e tabata kompletamente deshidratá. Despues di un siman di bon kuido e por a bai kana los den kura.

Yuana ta bestia ku por general por yuda nan kurpa nan mes. Algun bia bo por topa yu di yuana ku ta deshidratá. Hopi bia ta sufisiente si bo duna nan algun dia awa, fruta i berdura fresku pa bo yuda nan riba pia atrobe. Si bo gusta tin yuana den bo kura bo por ofresé nan fruta i berdura riba un skal plat. Un skal plat ku awa lo ta algu ku nan lo apresiá, sigur si ta trata di un periodo di sekura. Duele ku hopi bia kachó ta kue yuana. Mayoria bia e yuana no ta sobrebibí e atake aki, komo ku e daño interno ta grandi. Pero hopi bia nan ta pretendé di ta morto ku por kondusí ku nan por skapa di e situashon peligroso aki. Hopi bia bo ta mira e yuana bin bei i ta sigui su kaminda manera nada no a pasa.

©Rescueracao, translation Denice Bezemer
Like us @ Facebook

204