Mi nòmber ta Meente Schijf i mi ta veterinario. Mi a nase i krese na Hoorn. Semper di mi bida mi tabata okupá mi mes ku bestia, mi tabata kue salamander den vijver te ku hasi trabou di boluntario na asil di kachó. Mi a kore kabai pa un temporada basta largu i te hasta mi tabata tin un pòni di mi mes.

031
Ami ku Blue

For di chikí mi tabata sa kaba ku mi kier a bira veterinario. Manera mi a kaba ku mi skol sekundario VWO, mi a bai studia na Gent, Bèlgika pa bira veterinario. Despues di 7 aña mi a logra di haña aki mi diploma. Manera mi a kaba di studia mi a bin biba Kòrsou i mi ta trahando aworakí un aña i mei kaba aki ku hopi plaser. E ta un trabou atraktivo, variá ku mi ta saka hopi satisfakshon for di dje. Den mi trabou mi ta atendé mas ku pushi i kachó, lokual ku lo ta e tópikonan prinsipal di kua lo mi skirbi.
Aparte di mi trabou mi ta hopi okupá ku mi 2 kachónan, Raja i Pip, i mi pushi, Tippy. Ku tur dos kachó mi ta bai training di abilidat i mi a bai ku tur dos diferente training di komportashon. Banda di esei mi ta trata pa bai kana keiru mas tantu ku ta posibel ku nan. Aparte di ta okupá ku mi bestianan mi ta trata na bai sambuya ku regularidat. E bestianan bou di awa ta fasiná mi mes tantu ku esnan riba tera. Otro interes ku mi tin ta fotografia, pintamentu i lesa.

 

 

Advertenties