Mi ta kuminsá ku introdusí mi mes i konta dikon mi tin ya 8 aña ta traha komo boluntario na e Donkey Sanctuary Boneiru. Mi nòmber ta Marion Jeursen, mi tin 58 aña i henter mi bida kaba mi ta loko ku bestia. Na mi kas semper nos tabata tin bestia ta kria manera kachó, pushi, galiña, kabritu i kabai. 9 aña pasá mi a disidí di muda bin biba na Boneiru. Un kos ku a fasiná mi tabata di mira tur e burikunan ta kana los i tambe e yunan chikí di buriku ku mi ta haña masha dushi, inosente i prèt pa mira, anto tur esaki kantu di kaminda ku tin hopi tráfiko. I mi tin di atmití, ku mi tambe a kometé e fayo di bai duna nan kuminda kantu di kaya, sin sa ku mi tabata pone e burikunan su bida den peliger, pasobra ora bo mira e wowonan yen hamber, i bo mira e nanishi lif nan ei, bo ta dirti!

Poppylove!!
Ami ku Poppy, poppylove!

Nos tabata biba den un bario na un kaminda ku ta hopi drùk, ora anochi mi a tende un zonidu masha duru, mi a tende kon porta di outo tabata habri, mi a tende zundramentu i tambe buriku ku ta kore bai. Mi a bai wak si, pero mi no a mira nada.

Algun dia despues mi a bai kana keiru ku mi kachónan, mi a yega na un lugá kaminda tabata tin algun buriku ta kana, i mi a mira un buriku chikí mal heridá. Mi a hiba mi kachónan purá kas, mi a yama Marina Melis di fundashon Donkey Help (mi tabata sa ku esaki ta eksistí riba e isla) i mi a bai bèk. E yu di buriku a bai drumi entre tantu, mi a kohé, mi a pidi e mama despensa pasobra si mi no bai kuné lo e muri un morto miserabel. Mi a kita e shimis di tela di flanèl ku mi tabata tin bistí, pa mi lora su pata mal heridá aden, ya tabata tin bichi ta Sali for di e herida, i den mi bikini mi a kana mas o ménos 1 kilometer bai kas kuné riba mi brasa. Ora mi a yega kas, Marina tabata warda mi kaba, el a tuma e yu di buriku i el a bai veterinario inmediatamente kuné. Su siguiente dia mi a bai wak kon a para kuné na Sanctuary i mi tabata impreshoná pa e bon trabou ku nan a ehersé, lo bo komprondé, mi a mèldu un bes pa mi tambe traha ei komo boluntario. Na promé instante mitar dia, despues 1 dia henter i despues ku mi a konsulta ku mi kasa, mi a bai traha 4 dia pa siman. E trabou aki mi ta hasi kaba durante 8 aña ku hopi amor pero tambe ku hopi tristesa. Mi ta konsiente ku nos no por salba tur buriku, esei ya a kuminsá ku e yu chikí aya, ku nos a yama Noah, a bin resultá ku su rudia tabata kibrá na filingrana, ku e no por a kana komo konsekuensia i nos mester a lag’é bai sosegá.

Asina nos ta haña hopi buriku ku hende ta trese ku outo a dal! Tambe tin mas problema ku nos sa topa. Nos ta hasi lo máksimo pa nos salba tur buriku. Esei lo mi sigui amplia riba dje despues. Mi intenshon ta pa mi skirbi tur luna algu tokante di buriku. Aki bou mi ta amplia tokante e meta di Donkey Sanctuary Boneiru.

Donkey Sanctuary Boneiru ta hasi esfuerso pa ofresé tur buriku un bida protehá. Banda di esei e ta duna (in)formashon tokante di e mundu i bida di e burikunan na tur ku ta biba riba e isla, na skol i na turista. Na Donkey Sanctuary Boneiru tin mas ku 600 buriku ta permanesé na e momentu aki. Ta sòru pa nan haña awa, kuminda i kuido médiko i nan tin tur espasio pa nan por move den libertat.

Ora drenta un notifikashon ku tin un buriku den peliger, algun boluntario ta Sali pa bai yuda e bestia. Burikunan malu òf heridá ta wòrdu kuidá den e akohida di buriku, kaminda lo tuma kontakto ku un veterinario si esaki ta nesesario. Yunan di buriku sin mama ta wòrdu lanta ku bòter. Tur buriku machu ku drenta ta wòrdu kapá pa evitá ku e burikunan den e alohamentu aki ta sigui plama. Ora e bestianan kura, nan lo keda kuidá den e Donkey Sanctuary Boneiru pa restu di nan bida ku mil amor.

Den tur e añanan ku Donkey Sanctuary Boneiru ta eksistí a logra hopi. Hopi buriku a keda skapá for di situashonnan deplorabel for di riba kaya i a haña un eksistensia safe na e alohamentu. Lástimamente tabata tin tambe hopi buriku ku tabata asina malu òf heridá, ku no tabata kura mas pa nan. Donkey Sanctuary Boneiru a paga e gastunan di veterinario pa laga nan bai sosegá, pa asina libra nan di nan sufrimentu.

Nos tin un wepsait: www.donkeysanctuary.org òf sigui nos riba Facebook: Donkey Sanctuary Bonaire.

Hasta pronto e ora ei lo mi konta bo di e rekisitunan tokante di buriku!

Ku kordial saludo,

Marion

Advertenties