Komportashon seksual ta un kombinashon di buska aserkamentu i bringamentu. E komportashon aki ta un karakterístiko di buriku i ta bai segun sierto ritual: e muhé ta pishi den besindario di e hòmber, esaki na su turno ta hole na e orina i despues ku el a kaba di holé e ta kuminsá “flame” (pa nifikashon di flame, wak e komportashon sosial 2). Un ratu despues e muhé ta bira su parti patras den direkshon di e machu miéntras e ta hasi komo si fuera e ta kou ku su kabes bahá i su oreanan mandá patras. Despues di esaki e machu ta dèk e muhé, miéntras e muhé ketu bai ta hasi komo si fuera e ta kou. E burikunan machu ta mustra mas agresivo i persistente den nan manera di aserka e muhénan ku e otro sortonan di bestia ku ta kai bou di famia di kabai.

 

un buriku dek

E komportashon di e muhé ta ku e ta zuai ku su rabu, hap, pishi i hasi komo si fuera e ta hui. E burikunan muhé ta fèrtil kada 21-28 dia durante 2- 10 dia. Tin bia nan no ta bira fèrtil dependiendo di nan kondishon físiko òf si di su ambiente, ku no ta adekuá. Un buriku muhé su periodo di embaraso por varia di 11 te 13 luna.
Mayoria bia nan ta wèrp sin problema. Hopi bia nan ta isolá nan mes for di e grupo pa nan bai wèrp na un lugá trankil ku nan a skohe algun dia promé kaba i ku nan a “prepará” pa ora ta asina leu. Nan ta skrap e piedranan i otro opstákulo kita for di den kaminda, pa evitá ku e yu por herida su mes ora di e nasementu. E konekshon entre e mama i yu ta algu ku ta tuma algun tempu pa establesé su mes. Si e yu ta salú i e konekshon a keda kreá entre mama i yu, nan ta bai bèk serka e sobra burikunan. Mayoria buriku muhé ta komportá di un manera masha defensivo pa loke ta trata nan yu i nan tin kontakto físiko kontinuo ku nan yu. Hopi bia nan ta hole e yu òf kuida su kueru kontinuamente. Una bes ku e yu a kustumá ku su mama e tin mag di buska kontakto ku otronan den e grupo pero na e momentu ku tin peliger e mama ta yama i buska su yu. miéntras e yunan yòn ta sosegá, e mama ta keda den nan besindario pero segun tempu ta pasa e yunan mes ta keda serka banda di nan mama. E yunan un tiki mas bieu ta pasa temporada basta largu leu for di nan mama pero na e momentu ku tin peliger nan ta buska nan mama.
E yunan ta tuma e inisiativa pa bebe serka nan mama usualmente. E promé 5 dianan nan ta buska lechi kontinuamente serka e mama. E yunan ku ke bebe ta aserka nan mama di un manera masha trankil. Nan ta produsí un zonidu poko poko, manda e oreanan patras i nan por dal e mama ku nan kabes. E mama ku ke duna e yu oportunidat di bebe, ta keda para i ta dobla nan pata di patras un tiki. Sí e mama no tin gana di laga e yu bebe, e ta sigui kome yerba òf e ta kana bai. Si e yu sigui pidi pa bebe ni maske e mama no ke, e tin e chèns ku e mama por mordé òf klap e. Ora e yu ta bebe, e mama ta hole i si akaso e bebe muchu brutu, e mama ta morde poko poko den su pata patras. E yunan resien nasí ta bebe e promé dianan kada 15 pa 20 minüt mas o ménos 1 minüt largu. E frekuensia di bebe ta baha segun ku e yu krese i dia nan tin 8-10 luna e yunan ta stòp di bebe serka nan mama. Tin yu di buriku ku ta keda bebe serka nan mama te ku nan 14½- 16 luna si e mama no a bolbe haña otro yu.
E yu por bebe lechi na tur momentu posibel, pero mayoria biaha despues di un periodo ku nan tabata separa for di otro, despues di a sosegá òf ora a stroba nan i tambe ora nan mira otro e yu ta bebe serka su mama. E yunan ta bai laga e mama mayoria bia ora e mama bolbe haña un otro yu. E yunan muhé ta keda tin ora te ora nan mes haña nan promé yu.
E harem. E harem ta konsistí di diferente muhé ku yu, bou di guia di un machu dominante. E úniko manera pa no ta forma parti mas di un harem ta na momentu ku un yu ku ya e krese bira adulto wòrdu saká for di e harem dor di e machu ku ta e lider di e grupo òf si un otro machu tuma e mando over. Den sierto grupo di harem bo por topa ku algun machu adulto, ku ta supordiná bou di e lider di e harem. Mayoria bia e otro adultonan machu ta biba den grupo di soltero. Den ambiente di abundansia e burikunan ta preferá di biba den e sistema di harem.
Un mayoria di e yunan ta keda prokreá pa e buriku machu lider di e harem, algun por ta prokreá pa e machunan ku ta un tiki mas abou den e orden di e harem i apénas tin yu ku ta produkto di e burikunan ku ta biba den e grupo di machunan solitario. Tin bia por tin buriku ku ta biba los den un grupo strukturá sosial (grupo temporal chikí). Esaki ta konsistí di algun buriku ku ta keda algun dia huntu.
Mayoria bia den e besindario ku e gruponan aki ta biba no tin masha kuminda. E struktura sosial di e burikunan ta dependé, mayoria bia di e disponibilidat di kuminda i awa. Kaminda ta seku òf ta hopi seku un struktura sosial lòs ta predomina. E muhénan si kasi nunka no ta so, e muhénan adulto ta den kompania di nan yunan, e muhénan ku no ta fèrtil mas ta biba hopi bia den grupo ku otro buriku muhé i nan yunan, e muhénan ku tur aña ta duna lus ta biba den grupo huntu. E machunan yòn tambe ta sera kabes i bai biba den grupo pero segun e edat ta avansá nan ta bai komportá di un manera solitario. (Bachelorgroups). E machunan ta biba preferiblemente den un teritorio, den kua nan so tin e derechi di prokreá.
aktitut di machu

Tin algu di union sosial, pasobra manera e grupo keda strobá di un òf otro manera nan ta hui bai komo un grupo, pero, kontrali ku serka kabai, serka buriku no tin un tipo di lider. Den Oustralia Sentral tin grupo grandi di buriku ta biba. E machunan no tin un teritorio di nan mes i ta bringa pa e muhénan ku ta fèrtil. Den serunan di California, Arizona Oeste i New Mexico tin sierto machu ku tin un teritorio pa nan prokreá, ku nan ta protehá dor di produsí nan zonido i dor di sera e teritorio ku nan sushi. E muhénan ku ta fèrtil i ku no ta den un di e teritorionan aki di prokreá ta keda siguí tin biaha pa hopi mia dor di un grupo di e machunan te ora porfin e keda di dèk pa e machu di mas dominante. E muhénan ku tin un yu kaba, kontrali na e último ta preferá di keda serka e doño di e teritorio.
©Rescueracao MJ, potrètnan ta saká for di diferente fuente google.