Hopi bestia no ta disponé manera hende e abilidat di soda ora ta hasi muchu kalor pa deshasí di e kalor. Nan por logra esaki solamente dor di hala rosea purá òf via di nan planta di pia. Nan abilidat di deshasí di kalor en eksesivo ta limitá. Ora nan temperatura korporal ta ekstremadamente haltu nan ta kore e peliger di koha e proteina di nan kurpa lokual ku por kondusí na daño ireparabel.

Síntoma:

  • Keda hala rosea masha pura
  • Baba hopi, tin bia saka
  • Letargia (bira super slo)
  • Ta kayente ora bo mishi kuné
  • Un temperatura di kurpa entre 40.5 i 42 grado
  • Karni di djente i/òf lenga kòrá òf hasta lila
  • Pèrdè konosementu

Kiko pa hasi:

  •  Hiba e bestia na un lugá kaminda tin hopi sombra ku ta fresku
  • Spul’é ku awa, no muchu friu i wak bon pa no ta awa muchu kayente for di slan di awa (ku a kenta dor di solo por ehèmpel). Si bo no ta disponé di awa di kranchi sèrbètè muha tambe por yuda kualkier kos den kombinashon ku fèn òf erko ku tambe por baha e temperatura. Tapa prinsipalmente e partinan ku no tin lana. Un fèn so no ta sufisiente. I no bira basha un èmber di awa muchu lihé riba e kachó pero bai trankil pa e por kustumá ku e bahada di temperatura.
  • Monitoria e temperatura (ku un tèrmometer den su atras). Ora su temperatura a baha te bou di 40 grado Celsius bo por sek’é.
  • Si e ta bei bo por dun’é slòk di awa un tiki un tiki
  • Keda monitoria e temperatura i bai un veterinario

Para tambe por haña nan ku problema ku kalor en eksesivo. Pensa riba e paranan den kouchi òf e lora. Sigur si nan no tin akseso na sombra kalor eksesivo ta algu ku por sosodé masha lihé. Bo por rekonosé kalor en eksesivo serka bo paranan na lo siguiente, halamentu di rosea purá, habri alanan hanchu, i den kasonan mas serio tambaliá riba nan patanan, kai i kuminsá trèk. Bai ku e para na un lugá mas fresku, sòru pa tin sirkulashon di airu pa medio di un wairu i spùit e ku un tiki awa lou. Si bo para tin síntoma hopi serio di ekseso di kalor bo por traha un baño p’e konsistiendo di awa ku habon i pone den dje. E habon ta penetrá drenta den e lag di vèt ku e paranan tin riba nan plumanan pa evitá nan di muha, asina nan por fria un tiki mas lihé. Kòrda spul’é bon despues ku awa fresku pa kita e habon. sòru pa e para no guli habon. Tuma kontakto ku e veterinario.

©Rescueracao, translation Denice Bezemer. Like us @ Facebook

Advertenties