Wardakosta di e aria di Karibe (KWCARIB) a publiká e siman aki riba Facebook i via di medionan di komunikashon un anunsio ku tin diferente hende ku nan a kohe den e laman di Piskadera ku tabata piska ku harpun. Ni maske ku nan a purba skonde e harpunnan nan a logra haña nan i konfiská nan. Esaki ta konta tambe pa e sakunan di piska ku nan a tira ku harpun. Tur e hòmbernan aki a haña un prosèsverbal konvokatorio (OPV) i un prosèsverbal (PV) i wardakosta a pone énfasis riba e anunsio di e echo ku no ta permití pa hasi uzo di harpun riba nos isla. Esaki a kondusí na un kantidat grandi di reakshon via di e medionan sosial for di kua por dedusí ku un mayoria no sa e motibu pakiko ta prohibí di piska hasiendo uzo di harpun den nos awanan tambe a bin resultá ku tin burakunan den lei ku ta hasi e informashon konfuso. Kòrsou tin un dekreto tokante maneho di ref ku ta protehá e refnan di koral kontra di destrukshon, e ref ku nos ekonomia ta dependé pa un parti grandi di dje. Un di e motibunan kardinal pa prohibí uzo di harpun na Kòrsou, i un mayoria di e islanan den Karibe ta, pa e echo ku e manera di piska aki ta pone ku ta skohe ki tipo di piska bo ke kohe i tambe e grandura di piska òf otro organismo di bou di awa esei ta kondusí na desbalansa di e ekologia natural di e refnan, algu ku bo no ta haña tantu problema kuné si bo ta piska ku liña.

F00Harpoenen en overbevissing 1
Een Spotlight Parrotfish mannetje. FOTO WIKIMEDIA COMMONS

Esaki ta algu ku por ilustrá di un manera masha bon ku e gutu. 40 pa 50 aña pasá kasi no tabata kome e piskánan aki riba nos isla ni tampoko den e sobra aria di Karibe pa e simpel motibu ku den e tempu ei tabata tin un gran kantidat di Groupers i Snappers den e awanan, nan ta mas dushi i nan tin ménos wesu. Despues ku e piskánan aki, tambe pa motibu di e ambiente marina sierto sorto di piska, dor di muchu peska a disparsé for di e awanan, esaki tabata tin komo konsekuensia ku otro tipo di piska a subi riba e menú manera e gutu. Gutu ta esnan ku ta limpia e refnan di koral. Nan ta kome e alga ku ta kria riba e koral i sòru pa nan no bin tapa e ref por kompleto. Pa e motibu ei entre otro e ref ta keda salú i nos por disfrutá di awanan limpi. E machunan, e bestianan kolo briante ku ta nèt esnan ku tin kolo mas skerpi i ku ta bira mas grandi, tin un teritorio kaminda tin solamente 1 machu ta biba ku 40 te ku 50 muhé. Pasobra e mortalidat di e piskánan ta haltu ora nan ta chikí, nan ta pone webu tur dia. Di tal manera e piskánan ta purba na tene e kantidat di piska na nivel. Ora e muhé pone webu, mester tin naturalmente un hòmber pa fertilisá e webunan. Si e machu mester muri òf keda piská e muhé mas dominante den e grupo ta transformá bira un machu nobo (inkreibel pero bèrdat!). Pero e proseso aki ta tuma algun siman di tempu. Anto miéntras e transishon aki ta tumando lugá riba e pida ref aki lo no tin prokreashon di gutu. Esaki por ta un gòlpi den e oumento di e gutunan nobo den laman i ekológikamente esaki por ta un problema grandi.

Si akaso esnan ku ta hasi uzo di harpun tira de bes en kuando un machu, esaki lo no tin tantu influensia. Pero den práktika nos ta mira ku e bèrdat ta otro. Den pasado, pero tambe den e potrètnan ku KWCARIB ta kompartí ku regularidat, e yagdó a resultá di ta mata no solamente 1 machu sino saku yen di machu nan ta bin tera kuné. Kada un di e gutunan yen kolo ei ta nifiká un superfisio grandi di koral ku pa simannan largu no por fertilisá e webunan i lo no tin prokreashon. Di e manera aki e yagdónan ku ta hasi uzo di harpun ta laga un ref enorme kapá, i esaki tin komo konsekuensia ku e kantidat di piska, ku no ta di gaba rondó di nos isla, ta sigui bai patras. 2 aña pasá un rapòrt titulá “Status and Trends òf Caribbean Coral Reefs: 1970- 2012” a keda publiká, e resultado di 3 aña di investigashon di International Coral Reef Initiative (ICRI), Global Coral Reef Monitoring Network (GCRMN), e IUCN (International Union for the Conservation òf Nature) i United Nations Environmental Programme (UNEP).

For di e rapòrt a bin resultá ku e refnan di koral di e aria di Karibe a bai patras ku 50% den e último 50 aña. Segun e organisashonnan ya menshoná un desaroyo alarmante, mirando ku e refnan aki den Karibe ta bon pa 3 miar dòler pa aña di entrada di turismo i peska. E rapòrt ta dediká atenshon spesial riba e piskamentu na gran eskala di e piskánan ku ta mantené e koralnan, manera e gutu, i ta indiká ku e problema por bira asta mas grandi pa e koralnan si e klima sigui kambia. Segun e tim ku a hasi e investigashon e refnan di koral ku ta protehá kontra di piskamentu di mas, ta desaroyá muchu mas mihó i por manehá su mes mihó kontra di sushedat i otro faktor ku por okashoná strès, manera “bleaching” i asides di osean, i nan lo por kura nan mes mas fásil.

Tin diferente aria den Karibe ku ta protehá e piskánan ku ta mantené e koral, manera gutu pa evitá piskamentu di mas, entre e lugánan aki Mexico i isla bisiña Boneiru, aki tambe ta prohibí pa piska ku harpun ku eksepshon na esnan ku a risibí eksonerashon pa por kohe Lionfish.

E rapòrt ta indiká ku protekshon aktivo di e refnan di koral ta esensial pa e sobrebibensia di e refnan i di e benefisio ekonómiko ku nos komo hende ta saka afó. Medidanan di protekshon ku ta hasi menshon di dje ta ku ta prohibí pa hasi uzo di sierto trampa pa piska kuné, manera fuik i kanasta, piskamentu ku harpun den su totalidat pasobra e ta muchu kompliká pa prohibí pa kada sorto di harpun, i e prohibishon di hasi uzo di otro tipo di manera di piska ku por hasi daño na e otro bestianan ku ta mantené e refnan.

 

F00Harpoenen en overbevissing 2
Een slapend Spotlight Parrotfish vrouwtje. FOTO LEON PORS

Miéntras tantu aki na Kòrsou piskamentu ku harpun ta prohibí den su totalidat pa algun aña kaba, ku eksepshon di e kasonan kaminda sierto hende ta haña dispensashon di gobièrnu pa por piska riba lionfish, lokual ku ta pone ku e isla ta kana dilanti pa algun aña riba e diferente otro islanan di Karibe. Un kos ku ta remarkabel ta ku importashon i benta di e harpun no ta prohibí riba nos isla ni maske e ta kai bou di lei di Arma. Esaki ta un echo ku ta pone hopi hende pensa i ku ta pone hende hasi e pregunta ku nan rason “dikon ta bende (kumpra) e kos aki kaminda no tin pèrmit pa uz’é”. Banda di esei tin diferente práktika di piska den nos awanan ku tambe ta okashoná hopi daño ku tin nesesidat pa regulá pa evitá ku ta piska di mas. Piskamentu komersial ku botonan grandi ku redanan grandi ku nan ta hala na fondo di laman ta daña i brua tur kos, òf fuik ku ta los i bai traha komo trampa abou den fondo di laman, yená ku piska i turtuga ku a muri pa motibu ku nan a keda pegá. E práktikanan aki tambe tin nesesidat di regla, i mester kontrolá esaki. Pero a lo ménos Kòrsou tin 1 kos reglá, un rekomendashon a keda siguí, anto esei ta ku ta prohibí pa piska ku harpun.

Skirbí pa Michelle da Costa Gomez

 

 

Advertenties