Ku regularidat ta haña kachónan flaku flaku i malu ku mester di yudansa.

Na momentu ku bo topa un bai veterinario un bes kuné pa bo sa kiko ta pasando kuné i pa bo haña e remedi korekto p’e. Tambe na benefisio di bo bestianan ku bo ke mantené salú ta bon pa bo sa si e kacho por ta infektá ku algu kontagioso.

  • Tin algun malesa ku ta paresé ku regularidat riba nos isla
  • Karpattenziekte (malesa okashoná pa karpata)
  • Bichi di kurason
  • Sarna, Demodex i Scabiës
  • Parvo (mayoria bia ta trata di yu di kacho i adultonan hopi yòn)
  • Giardia i bichi di hak i coccidiose
  • Hondenziekte
  • Kachónan masha flaku
  • Parti di nan miembronan kibrá
  • Bichi, pruga, pieu i karpata
  • CTVT, Canine transmissible venereal tumor

Parvo, giardia, coccidiose, haakwormen, hondenziekte i scabiës ta kontagioso (no tantu intensivo). Di mes ku bichi, pruga, pieu i karpata ta algu ku ta pasa fásil pa otro pero esei no ta difísil pa duna tratamentu kontra di dje òf no ta eksihí un tratamentu òf ta duna síntomanan manera e otro malesanan ya menshoná. Sobra no ta kontagioso.

Un korto deskripshon di malesanan, PAGA TINU e lista no ta kompleto, i mi no ta un veterinario. Pa un splikashon mas amplio akudí serka un veterinario.

IMG_0211
Gibi dia el a bin

Karpattenziekte (malesa di karpata) en breve, ta un malesa ku ta keda transmití pa e kacho via di karpata. E ta manifestá su mes na diferente manera. Mayoria bia bo ta nota esaki si di gòlpi bo kacho no ke kome mas i su kurpa no tin grasia. Su karni djente mayoria bia ta blanku i tin bia e por haña sangramentu den forma di punta òf e kacho diripiente ta bai sangra di su nanishi. Sin tratamentu e malesa aki ta fatal, e por ta algu skondí pa hopi tempu promé ku bo nota algu. E chèns pa kura ta bon. Mayoria bia despues di un tratamentu ku antibiótika (Doxy) tur kos por pasa. Si e keda pa hopi tempu sin tratamentu e por afektá e órganonan e ora ei e chèns pa kura a bira masha chikí. E forma aktivo di e malesa ku ta okashoná e sangramentu di punta i tambe di nanishi tin mas riesgo kuné pero dor di reakshoná riba lokual ku bo ta mira i bai e veterinario na tempu e por sobrebibí mayoria bia. Si bo haña un kacho ku ta yen di karpata e chèns ta grandi ku e tin e malesa aki. Sea kouteloso ora bo ke ranka saka e karpatanan aki. E por okashoná sangramentu. Den e kaso ei ta mihó pa bo trata e kacho ku un produkto ku ta seif i no muchu pisá kontra di karpata i warda te ora e karpatanan muri en bes di sinta ranka tur kita. Malesa di karpata

Hondenziekte en breve. Wowonan sushi, pulmon sushi, kentura i trèkmentu ku su múskulonan. Mayoria bia bo ta mira esaki un bes na e múskulonan di kabes. E kacho ta mustra manera e tin un steipi. E trèkmentu di múskulo ta den un fase mas avansá e ta bira bisto. Tin un chèns pa kura pero bo lo tin ku puntra bo mes si esaki ta algu ku sentido pa bo hasi. Hondenziekte ta algu ku ta sumamente kontagioso. Anto e steipi ta kos ku ta keda, i e ta masha difísil pa biba kuné. Esaki ta nifiká ku ora ta trata di Hondenziekte e solushon mas humano hopi bia ta pa laga e kacho bai sosegá. Si bo no tin otro kacho i bo kachó ta un kaso dudoso lo mi bisa dun’é un chèns. Tin bia nan tin kentura, wowo sushi i pulmon sushi pero e ora ei e por ta trata di un kaso di mal kondishon i e kacho no ta sufri di Hondenziekte. Si bo a yuda un kacho ku e malesa aki i bo ta bai bo kas bèk? Kita bo pañanan i sapatunan i pone nan 48 ora den un saku será i despues den wasmashin i no lubidá di desinfektá bo outo. E bakteria ku ta okashoná e malesa aki no ta sobrebibí 48 ora den un otro ambiente.

271
Gibi despues ku el a kura, Gibs a keda te dia di su morto

Bichi di kurason en breve, bichi di kurason ta keda transmití pa sangura. Pa evitá ku bo kacho ta keda kontagia ku e bichi di kurason ta importante pa uza tur luna e remedi preventivo kontra di bichi di kurason. Paga tinu si ku e bichi aki ta otro tipo di bichi ku esnan den e sistema di tripa, esei ta nifiká ku e produktonan preventivo kontra di e bichinan aki no ta funshoná kontra di e bichinan di kurason. Nos tabata duna nos kachónan tur luna Heartguard kontra di bichi di kurason banda di e Drontal ku nos tabata uza 4x pa aña kontra di e otro bichinan. Tin marka di remedi na benta ku ta kombatí tur tipo di bichi, pero eseinan no ta tur kaminda na benta. E bichi di kurason ta bai den e kurason di e kacho i na dado momento e ta plama tur kaminda den su kurason ku tur e konsekuensianan ku e por bin kuné. Un kacho ku e bichi di kurason por kura. Pero e tratamentu no ta nada fásil i e por tin su riesgonan. E kacho ta haña algun bia un líkido den su wesu di lomba inyektá ku ta disolvé e bichi. Komo ku e bichi ta kibra na pida pida e pidanan aki tin ku keda transportá via di e sistema di ardu ku por sòru pa blòkia e ardunan. Sosiegu den e temporada di tratamentu ta masha importante. Esaki ta un proseso ku ta tuma luna pero ku ta bal la pena. Tur e kachónan ku mi a mira ku e malesa a sobrebibí despues di tratamentu.

Sarna en breve, e siguiente 2 sortonan di sarna tin riba nos isla. Scabiës i Demodex. Tur dos tipo nos a yega di topa riba kachónan ku nos a alohá na kas. Pa sa si ta trata di Scabiës òf Demodex, mester laga raspa un tiki di e kueru afektá pa wak bou di mikroskop. Ku bo wowonan bo no ta mira ta kua tipo ta trata di dje.

Scabiës ta kontagioso pa hende i bestia. Dor di tin kontakto ku nan ora di drumi òf dor di drumi riba otro su deken nan por keda kontagia. For di eksperensia mi tin ku bisa ku e no ta pega asina fásil manera hende ta pensa. Kasi sigur nos lo por tabata tin suerte pero despues di a pasa e di 2 angua mi tabata pone nan gewon den e grupo di kacho bèk. Pues en realidat mi tabata tene nan algu mas ku un siman apartá. Veterinarionan ta konsehá pa pone nan huntu ku e otro kachónan despues di e di 3 angua. E kachónan ku ta infektá ku Scabiës tin ku haña inyekshon 4-6 siman semanalmente kontra di e Scabiës. Despues di e promé inyekshon mayoria bia nan ta haña mas grawatashi. Despues di e di 2 inyekshon e Scabiës ta bira ménos aktivo. Mi mes tabata tin kontakto normal ku e kachónan pero mi tabata laba mi mannan masha bon kada be ku mi mishi ku nan. Sèrbètè mi tabata laba apartá i tur dia mi tabata limpia e espasio i kambia e sèrbètènan tur dia. Lokual ku tabata grasioso pa mira ta kon e kueru tabata kambia den kurso di e simannan. Despues di algun siman bo ta mira kon e kabei ta kuminsá krese bek i kon tur e ròchinan ta disparsé. E kueru seku mi tabata hunta ku regularidat ku zeta di bebi anto despues pasa un skeiru moli òf un sèrbètè seku riba dje pa kita e kaskanan.

img_4759
Wally e promé dia ku sarna i flaku

Demodex nan ta haña via di nan mama promé ku nan nase. Demodex no ta algu kontagioso i tambe ta algu ku ta kurabel. E proseso aki ta algu ku ta tuma su tempu anto ora su resistensia baha e por bin un tiki bèk. Pensa riba un rekaida despues di por ehèmpel un operashon, kapamentu òf malesa. E kura por tuma su tempu, pero realisá bo mes ku Demodex ta algu ku bo ta haña solamente serka kacho chikí. Ora nan bira mas grandi e no ta molestiá nan mas. E arte ta pa mantené e sistema imunológiko mas tantu ku ta posibel na nivel. Bravecto ta kurabel demodex.

Parvo, Giardia, Coccidiose i Haakwormen (bichi di hak) en breve, tur ta kos ku bo ta topa hopi na nos isla i ta okashoná hopi morto. Mayoria bia e ta toka kachónan chikí, i tin bia tambe adultonan yòn òf bestianan bieu i suak. Den tur e kasonan aki e kacho ku ta infektá ta slap i e tin habrimentu di barika, mayoria bia ku sanger òf sleim den dje. Nos a skohe pa hasi menshon di tur bou di un titular pa motibu ku tur nan síntomanan parse otro hopi. Solamente e veterinario por wak bou di mikroskop kiko ta nan problema i preskribí e remedi korekto. Sigur serka yu di kacho, semper bai laga e dòkter wak e si e tin habrimentu di barika. Aparte di e remedi korekto ta importante tambe pa nan bebe hopi. Keda dun’é líkido ku ORS (wak bou di e titular kuido di yu di kacho) den su boka. Si esaki no logra òf si bo nota ku mas líkido ta sali ku bo ta hinka aden ta bon pa bo laga dun’é pal’i bida inmediatamente serka un veterinario. For di eksperensia nos a siña ku un kacho ku a haña pal’i bida tin mas chèns di rekuperá ku esun ku no a keda konektá na un, sigur ora ta trata kachónan ku a bira hopi suak. Tene kuidou ora bo bai spùit líkido den e boka pa bo no pone muchu preshon i spùit sin bo por yuda e líkido den su pulmon.

033-2
Wally mas o ménos 6 siman despues, e tambe a logra haña un kas permanente

Kachónan hopi flaku. Ku regularidat sa topa un “saku di wesu”. Kachónan flaku manera karpachi ni maske kon suak nan ta nan ta fuerte! Ku bon kuido hopi bia nan ta salba. Semper buska pa sa e motibu dikon nan ta flaku asin’ei serka un veterinario, no ta tur bia ta falta di kuminda so ta hasi flaku, por ta parasit òf malesa tambe. Si bo ke logra gana e kacho riba su peso ideal, lo bo tin ku sòru no solamente pa e kuminda korekto sino tambe kubri tur su aspektonan di salú. Mayoria bia ta kuminsá ku deshasí di bichi i ku un produkto kontra di pieu/ karpata. Ora bo mira un kacho flaku asina e promé kos ku bo tin maya di hasi ta dun’é un baki bon yená ku kuminda. No hasi e kos aki! Su kurpa probablemente a deskustumá ku kuminda i tin ku dun’é gradualmente. Kuminsá dun’é buyon ku karni di baka òf galiña ora nan ta hopi suak. Dun’é kantidat chikí di kuminda di kacho seku ku bo a pone muha si e por para riba su pia basta bon ainda. Laga e stoma kustumá masha trankil atrobe ku kuminda i preferibel dun’é 5-6 bia pa dia un tiki en bes di hopi den un tiru. Nutrical ta un bon suplemento pa loke ta trata mineral. Tin un kuminda di astronout tambe ku bo por kumpra na bo veterinario spesial pa e kasonan aki pero e ta karu. Pero e ta traha masha bon mes. Keda repartí e kuminda masha gradualmente riba un dia, ta mihó pa e kacho subi trankil di peso en bes di ta riba peso den un siman di tempu. Mayoria bia den e tipo di kasonan aki nos a duna e kacho kuminda pa yu di kacho komo ku e ta mas riku na nutriente.

img_4728
Foto horibel, kacho ku lomba kibrá. E tabata lam te na su nèk. A lag’é drumi.

Miembronan kibrá en breve, hopi kacho ta wòrdu di dal ku outo i nan ta kibra nan hep, pata i lomba. Mayoria fraktura ta kos ku por trata, esta si e reflèksnan ta funshoná ainda i si e ta reakshoná riba estímulo di doló. Tin bia pa medio di amputashon, tin bia pa medio di geps, tin bia pa medio di operashon i tin bia dor di tene sosiegu den kouchi. Kontal, ku tin ku hasi algu sí. Bo no por lag’é asina sin mas. Despues di un bishita na e veterinario e promé 48 ora despues di a aksidente ta krusial. Den e 48 ora ei e mester a pupu i pishi. Si esaki no ta e kaso ta bira sin sentido pa kontinuá. E nervionan ta muchu afektá. Si nan a pupu i pishi e ora ei ta bal la pena pa sigui yuda e kacho. Hopi kacho ku tabata hopi malu a rekuperá por kompleto despues di tratamentu ku nan por a sigui biba un bida aseptabel pa un kacho. Lo bo keda asombrá kon fleksibel kacho ta. Semper ta bon si pa deliberá i wak kiko ta mihó pa e bestia. No lag’é sufri innesesariamente pero tampoko no entrega un be. Un balansa salú i sano huisio, evitá emoshon ku no ta duna e mihó konseho. Paga tinu..kachónan ku tin miembronan kibrá ta sinti doló. Den e kaso aki si bo ke hisa nan for di kaya e chèns ta grandi ku nan lo morde bo. Ami semper tin un busá den mi outo ku mi por bisti su boka kuné promé ku mi bai karga nan i semper mi tabata mara nan PROME ku mi bisti nan e. Mester tin sigur ku e kacho ta keda ei promé ku bo bai bistié e busá. Bo ke evitá ku e ta kore bai ku su boka mará. Si akaso bo no tin un busá serka bo, hopi bia bo por hasi uzo di un kabuya òf un faha pa bo mara su boka kuné. Òf bo por lora su kabes den un sèrbètè diki ku kasi no ta posibel pa e morde bo.

Bichi, pieu, pruga i karpata, duna bo kacho tratamentu mas pronto ku ta posibel kontra di e plaganan aki. Si e kacho ta suak bo por trat’é ku frontline ku ta basta seif pa bo deshasí di e promé bestianan. Si bo nota ku e kacho ta bai sangra ora bo ranka kita e karpatanan un pa un e chèns ta grandi ku e por tin e malesa di karpata. No kontinuá ranka e karpatanan pero spùit e kacho bon ku kos kontra di karpata. E kacho lo pèrdè muchu sanger si bo sigui. Dor di spùit e, e bestianan ta muri pero bo ta evitá herida. Si bo kacho ta mas fuerte bo por hasi uzo di produktonan mas fuerte pero aki tambe ta konta…buska nan serka bo veterinario. Na Kòrsou petshopnan sa bende produktonan ku ta muchu stèrki ku tin kacho ku a muri di nan. Pa bo deshasí di bichi mester hasi uzo di sierto píldora, no lubidá di ripití e tratamentu despues di 14 dia…

CTVT, Canine transmissible venereal tumor. Masha breve bisá tumor ku ta keda kontagia di kacho pa kacho dor di relashon seksual. Mayoria bia bo ta topa nan na e partinan íntimo di e kacho, tin bia tambe riba e nanishi òf na su boka. E ta algu ku por trata bon ku kimoterápia. Kachónan apénas tin efekto negativo di kimoterápia.

E siguiente sine nan no ta masha agradabel pa mira pero nan ta informativo sí. Bo ta mira den tur dos video un kacho ku e síntomanan típiko di malesa di kacho. Tur dos kacho a pone sosegá.

 

©Rescueracao, translation Denice Bezemer. Like us @ Facebook