Mi nòmber ta Denice Bezemer-Hoyer, i mi ta na enkargo di e tradukshon di e tekstonan skirbi pa diferente hende na Papiamentu.

Denice met Tuti en Balto
Denice Tuti & Balto

Mi a nase i biba na Kòrsou te ku 1981 ku mi a bai Ulanda pa mi bai studia. Durante mi promé 18 añanan di bida aki na Kòrsou, nos kas semper tabata yená ku bestia. Tur sorto di bestia ku nos komo yu (8) tabata kana topa den nos kaminda ku tabata tin mester di yudansa nos tabata hiba kas. Asina nos kas tabata tin 2 pa 3 kachó (tin bia mas), 2 pa 3 pushi, un kolebra (Sssaskia), raton blanku, kabritu, porko, galiña, patu, konènchi, prikichi i asina mi por sigui menshoná. Mi mayornan nunka no a keha, te hasta mi por bisa, nan a stimulá nos. Asina mi ta kòrda kon un bia nos a bai pasa un wikènt na Westpunt, nos a bai ku un outo yen ku kos di kas i kuminda i mucha i e otro outo tabata yená ku bestia i nan kuminda. Anto di mes, ta nèt e outo aki tabata enbolbí den un aksidente riba punta di brùg! Danki Dios sin ku tabata tin daño personal. Ora e polis ku a bin atendé ku tráfiko a bin habri porta di outo el a hañ’é ku un koro ta enkontr’é di bestia ku tabata den outo (kachónan, kabritu, pushi, prikichi i 2 kachó). Ta bon ku el a dal e porta di outo sera un bes, pasobra bo por imaginá bo kiko lo a pasa si e bestianan a hui Sali for di outo?

20160304_104751
Tuti

Despues ku mi a kaba mi estudio di “higienista di boka” mi a biba i traha algun aña ku hopi plaser na Ulanda. Pero mi kasa, tabata tin masha gana di bin biba Kòrsou lokual ku nos a hasi 22 aña pasá. Mi kasa a sinti un bes ku el a yega kas (e a nase i biba na Ulanda i Alemania) i ami tabata sinti masha falta di Ulanda na promé instante. Nos tabata tin un kachó un Jack Russel Terrier, Tommy, ku a bin ku nos for di Ulanda. E momento ku el a buta su pata riba nos isla el a kombertí den un machu di promé klase. E tabata buska problema ku e kachónan di mas grandi ku bo por imaginá bo i tabata kana tras di tur e kachónan muhé. Nos a laga kap’é un bes. Pa nos Tommy tabata nos promé yu. Despues ku nos yu a nase e ku Tommy tabata inseparabel, pero despues di 2 aña tòg nos mester a duna hende Tommy pa motibu ku nos yu tabata tin hopi alergia pa motibu di Tommy. E kos aki a duel nos asina tantu ku nos a disidí ku nunka mas nos lo no kuminsá ku krio di bestia.

20151221_190840
Balto

Awor despues di algun aña nos yu mes tabata tin masha gana di kachó, nos mes tambe, pero nos no tabata tribi di hasi e kos aki. Un dia un amiga di mi tabata tin algun yu di Chihuahua i nos no por a risistí e tentashon, i promé ku nos por a pensa nos a bin ku 2 kas. Na promé instante mi tabata tin masha miedu pasobra mi no kier a bolbe pasa den e mesun trouma di e tempu aya, pero danki Dios tur kos ta bai bon i awor atrobe nos tin un kas yen di bestia. Pasobra nos tin un famia di pushi tambe ku a adoptá nos.

Pa mi ta un plaser di hasi e trabou di tradukshon, no solamente mi ta siña hopi di dje, pero tambe mi ta kere den konsientisá hende. Na mi pareser tin un nesesidat grandi aki pa siña hende kon pa atendé ku nan bestianan kon pa kuida nan i e nesesidat di kuminda nutritivo i awa fresku!

Advertenties