Dor di duna sufisiente espasio, dor di enrikesé e ambiente material/wega i kompania di otronan di e mesun sorto i kompania di abo komo doño.

Pero kiko esei ta nifiká, pasobra ekspresá bo mes di un manera natural por keda interpretá na diferente manera. Bo por te hasta bisa ku e ta enserá tur lokual ku duna un animal plaser pa hasi òf ku bestianan ta hasi pasobra e ta forma parti di nan.

Un lora gusta destrosá i kibra kos. E gusta hasi kos pa e por yega na su kuminda. Esaki ta nifiká buska i eksplorá. E ta keda enkantá si bo skonde su kuminda den kos ku e mester kibra habri pa e yega n’e. Tambe e gusta tuma un baño pa e por limpia su plumanan. E gusta karisia su partner i mester tin e espasio pa bula.

Kachó mester por hunga, mester bai landa ku nan òf djis hiba nan un kaminda ku ta otro for di kas pa nan por kana hole i eksplorá. Kachó tambe gusta hasi algu pa yega na nan kuminda. Un “activityball” òf “Kong” ta ko’i hunga ku ta tremendo pa skonde kos di kome aden. Weganan di buska kos, weganan ku ta pone nan pensa i buska, siña hasi sierto ehersisio ta kosnan ku kachó gusta i kosnan ku ta hasi nan masha felis. Pero tambe djis e kontakto ku hende. Kachó ta bestia masha sosial, si nan no tin e kontakto sosial nan ta bira masha infelis.

Pushinan mester por sleip nan uñanan, mester por hunga, i yag. Di mes no ta tur hende ke un pushi ku ta yag den nan kura, den e kaso ei bo por remplasá e wega di yagmentu ku algun kos di hunga spesial ku bo por hunga kuné. Tin hengel ku pluma pega n’e i tambe bala chikí ku ta kosnan ku nan gusta yag riba dje, òf un simpel palu ku un pida kabuya mará n’e.

Kada bestia tin nan nesesidat i komportashon natural. Ta algu sumamente agradabel pa bo buska pa sa mas a fondo kiko nan ta hasi i dikon nan ta hasié. Nos ta hasi muchu tiki pa koperá ku nan bienestar i esei ta pika. Bo por gosa asina tantu mas di nan miéntras nan tambe por gosa di mas libertat i nan ta sinti nan bon. Nos tin ku siña ku e bestianan no t’ei solamente djis pa nos plaser, nos tin ku balorá nan mas. Meskos ku nos tur ke pa hende balorá nos pa lokual ku nos ta. Nos tin ku duna nan mihó kuido. Laga esei ta nos bon intenshon pa aña 2016.

©Rescueracao, credits translation Denice Bezemer

Advertenties