Libertat di doló, herida i malesa, por logra esaki dor di  tuma medidanan preventivo manera pasa angua i kombatimentu di plaga i yega na un diagnóstiko rápido i tratamentu serka un veterinario. Tambe mester sòru pa e ambiente kaminda e bestia ta frekuentá ta limpi i sigur pa evitá malesa i leshon.

109
Kada bestia tin derechi riba un kuido médiko adekuá p’e. Aki tambe ta konta, ku esaki por ta diferente pa kada un tipo di bestia. Algun kos lo ta igual pero algun lo ta kompletamente distinto. Pa un pushi lo bo no tin mester di un smet ku ta traha pata di heru pa kabai.

Laga nos kuminsá ku prevenshon di malesa, ku prevenshon bo ta evitá ku e bestia ta bira malu dor di protehé kontra di malesa.

Kachó:

  • Serka yu di kachó ta kuminsá ku angua for di e momento ku e tin 6 siman, despues ta sigui ku sigur 2 ènter mas den e siguiente simannan. (esaki ta dependé di e skema di pasa ènter di e veterinario). Esun ku e yu di kachó mester haña pa protehé kontra (e malesa ku ta hopi eksistente na nos isla) parvo i malesa di kachó (ménos frekuente aki ta malesa di Weil i un malesa kontagioso di igra). Dia e tin 1 aña i despues tur aña atrobe ta bolbe ripití e anguanan aki pa evitá e malesanan ya menshoná. Hopi bia bo ta tende ku no ta hasi nada si ènter nan ménos, esaki por ta posibel pero e ora ei bo mester laga hasi un “titertest” serka nan pa wak si nan tin sufisiente antistof presente. No bai tira pará, pasobra tin muchu kaso di parvo i malesa di kachó presente riba e isla aki. Parvo i malesa di kachó ta malesanan hopi serio, ku ta hopi karu den tratamentu i hopi bia nan ta resultá fatal pa e kachó.
  • Tur luna mester duna e kachó un tablèt pa e kou kontra di bichi na kurason, bichi na kurason ta algu ku e kachó por haña via di sangura. E larvanan ta yega via di e sanger na e kurason kaminda nan ta desaroyá nan mes den bichi basta grandi. Nan ta afektá e kurason ku tur konsekuensia ku bo por imaginá bo.
  • Dependiendo di kiko bo a kustumá di uza, sea semanalmente/ mensualmente òf un bia den kada 3 luna, bo mester hasi tratamentu ku bo kachó pa protehé kontra di pruga i karpata. Pruga pasobra nan ta duna hopi grawatashi i pasobra pruga ta kontagia nan ku parasit di tripa ku tambe ta un bichi. Karpata pasobra kachónan por bira malu di nan i nan por haña bludumentu interno.
  • Deshasí kachó di bichi ta sumamente Den e kaso aki ta trata di bichi ku tin den e tripanan komo por ehèmpel bichi di sinta, bichi hak i “spoelworm”. Esakinan ta otro tipo di bichi ku e bichinan di kurason. Bo ta kuminsá deshasí di nan di na momento ku e kachó tin 4-6-8 i 12 siman. kachónan adulto tin ku keda deshasí di bichi 2 -4 bia pa aña. Si akaso bo tin un plaga formal di pruga e no ta hasi daño pa deshasí un bia èkstra di bichi.
  • Dor di sterilisá/kapa òf evitá ku un kachó ta tene relashon seksual bo ta evitá ku e por haña tumor ku ta kontagioso via di relashon seksual na nan partinan íntimo. E tumornan aki ta kosnan ku bo ta topa hopi riba nos isla.

Pushi

  • Pushi i yu di pushi tambe meskos ku kachó chikí i kachónan adulto tin nan skema di pasa angua. Lokual ku ta komun bou di pushi ta malesa di pushi, malesa di nistermentu i Sida di pushi.
  • Pushi tambe tin bichi den nan tripanan i meskos ku kachó tin ku deshasí di nan tambe, preferibel 4 x pa aña.
  • Pruga i karpata ta mesun ferfelu pa e pushi ku nan ta pa kachó i atrobe dependiendo di kiko bo ta hasi uzo di dje maske ta un bia pa luna e ta rekerí bo atenshon.

Kabai

  • Deshasí di bichi, kada 3 luna sigur si tin buriku tambe presente. Buriku tin mas lihé bichi di pulmon lokual ku ta masha peligroso pa kabai. Ta masha importante pa dun’é un tratamentu di Ivermectine, na servisio veterinario bo por laga hasi un tèst ku su sushi pa fl. 7,50 anto si bo kabai no tin bichi, na un prinsipio no tin nodi di duna tratamentu kontra di bichi.
  • Laga pasa angua tur aña.
  • Laga e smet ku ta traha sapatu pa kabai wak e kada 4 -6 siman.

Ku tur e medidanan aki bo por evitá pa un gran parti ku bo animal doméstiko ta bira malu. Asina bo ta evitá tambe ku bo ta haña bo ku hopi gastu di un veterinario. Dimes un bestia por bira malu ni maske kon bo a prevení. No ta tur malesa bo por prevení. Esei ta konta meskos ku pa hende, lástimamente pa bestia tambe.

Bestia tambe tin derechi riba un bon trato di un veterinario den kaso di malesa òf un desgrasia. Bo no por laga un kachó ku un pata kibrá sigui kana riba dje òf por ehèmpel un kachó ku sarna tampoko bo no por laga sigui kana rònt asina pasobra e no ta kumbiní bo hasi algu kuné. Si bo mes bai spalk e pia òf bo mes bai hunta remedi riba e sarna mayoria bia e problema ta bira pió i bo ta hasi mas daño ku bon. Mayoria di kosnan ku hende ta hasi uzo di dje, kosnan komun i koriente no tin e efekto deseá.

Remedi preskribí pa un hende no ta adekuá pa bestia. Esakinan ta kosnan ku bo mester pensa promé riba dje promé ku bo kuminsá ku krio di bestia.  Mi por i ke paga p’e? Si bo no por òf no ke, no hard feelings, pero mihó bo no kuminsá ku krio di bestia. E bestia ta dependé di bo i e ta bo responsabilidat pa e haña e kuido nesesario.

Si un bestia ta hopi malu no lag’é sigui sufri dor di warda te dia òf ora e muri i dun’é e balor di un fin digno. Un fin digno no ta un biahe “one way” pa Landfill òf mondi. Un fin digno ta eksihí un bishita di dòkter pa yuda sak’é for di su sufrimentu. E ta algu hopi difísil, niun tiki agradabel pa hasi i e ta kostoso pero e ta algu ku ta forma parti di bida. Tuma responsabilidat

©Rescueracao, credits translation Denice Bezemer

Advertenties