LIBERTAT DI INKOMODIDAT, dor di duna espasio adekuá i amplio inkluso un lugá agradabel kaminda e por skonde pa solo, kalor i áwaseru. Un espasio sufisiente grandi kaminda por move liber.

Mi a amplia kaba riba esaki den e artíkulo “Libertat di angustia i strès”. A yega e momento pa sigui amplia un tiki mas riba dje. Dikon e espasio ku bo ta duna bo animal ta tantu importante. Simpel….pasobra esaki ta tur kos ku e tin pa restu di su bida. Tur lokual ku abo dun’é òf laga di dun’é ta lokual ku bida ta kontené p’e. Si bo wak e bon ta straño, ku nos bestianan ta haña asina tiki rèspèt i ta laga nan biba den miseria. Aki tambe ta konta, sea honesto i wak dor di wowonan di e bestia? Dikon e lo gusta di ta mará dia aden dia afó? Dikon un kadena mará na su garganta lo no strob’é? Dikon lo e no sintié malu si e tin ku keda para den áwaseru òf den e solo kayente? Dikon e lo no sintié malu si e tin ku keda henter dia sera den un hòki chikí i kalor òf den un stal, wardando riba e dianan pa pasa? Dikon e lo no sintié i nos si lo sintié si nos tabata den e mesun situashon? Pasobra e ta un bestia? òf pasobra ta trata “djis” di un bestia? Ken ta duna nos e derechi di atendé asina?

IMG_1166

Si nos paga bon tinu nos lo ripara ku serka e bestianan ku tin ku biba bou di e kondishonnan aki ku nan tin hopi strès. Bestia, meskos ku hende, ta bira masha infelis si nan tin ku biba bou di sirkunstansia ku ta stroba nan di ta liber di un òf otro manera. Nos ta papia spesífikamente di un òf otro manera di libertat, pero tokante di esaki aworó lo mi amplia un tiki mas. Bestia tambe ta sinti strès di un manera formal ora nan ta será den un kouchi muchu chikí òf ku tin nan será. Esun bestia tin mas problema ku esaki ku otro, kachó por ehèmpel no ta bestia ku mester ta mará òf den un hòki será. Nan mester di movishon. Nan tin nesesidat di movishon korporal i tambe estímulo síkiko den nan bida. Si nan no haña esaki nan lo bai grita hopi, yora, kibra kos, nan lo bira miedoso òf netamente agresivo, i nan lo bira masha brutu esun bia ku nan haña atenshon. Nan ta kana den e mesun rònchi i nan por bira masha agresivo ora nan nota e kachó di bisiña. Nan úniko kos di pasa tempu kuné ta e kachó ku ta kana ei ku nan ta mira i ku nan por grita un ratu. E ora ei nos no ta ni papia ainda di e molèster ku nan tin di e kadena rondó di nan garganta. Hopi bia e banchi òf kadena ta muchu pèrta òf ta feila nan garganta. Pa motibu ku no tin masha atenshon pa e kachó hopi bia e kadena òf banchi ta asina pèrta te ku e a habri e garganta na herida ku konsekuensia un herida habri ta hole stinki. Manera bo lo ta komprondé, un kachó mará òf será no ta un solushon ku ta adekuá pa bestia. Banda di esei, e motibu pa a tuma un kachó hopi bia, 9 di 10 bia, ta pa warda kas i e funshon aki e no por kumpli kuné miéntras ta trat’é asina. Pa ki motibu no, esaki mi a skirbi den “Un bon kachó di warda”.

Oké, asina nos por bisa no na un kadena òf kouchi? I los riba kaya, esei ta mihó? No esei ta e otro ekstremo. Un kachó mester ta biba den seguridat di su kura. Riba kaya tambe e ta eksperensia hopi inkomodidat. E ta keda eksponé na tráfiko i un desgrasia ta na kurpa di palu. Tambe bo ta okashoná inkomodidat pa motibu ku otro hende no ta gusta topa un kachó den nan kaminda i nan ta kore kuné, dor di mand’é ku piedra òf batié ku palu. Aparte di esei, nan ta haña nan konfrontá ku otro kachó ku por okashoná konflikto ku nan lokual ku por terminá den bringamentu i herida ku por ta serio. Hopi kachó ta bin bèk ku heridanan serio di mordé ku ta rekerí trato veterinario. Anto un desbentaha mas ku ta konta pa Kòrsou ta ku tin demasiado kachó. kachó muhé “loops” ku ta kana den bario ku ta bin kas bèk dek.  Bo ta kompartí na hopi sufrimentu si bo laga bo kachó Sali na estado. ehèmpel nos no tin nodi di menshoná, riba e site aki mes bo por mira kuantu sufrimentu tin.

IMG_4728
hond aangereden, gebroken rug, eigenaar nooit gevonden

I e otro bestianan awor? No ta importá ki bestia bo tin. Sea ku ta trata di galiña, konènchi, kabai, kabritu, pushi òf para, tur tin derechi riba sufisiente espasio pa nan por move liber, un lugá kaminda nan por skonde pa solo òf áwaseru, un lugá kaminda nan lo por isolá nan mes si nan ta sinti e nesesidat pa hasi esaki i un lugá kaminda nan por sosegá ku ta destiná pa e tipo di bestia aki. Bo no por spera di ta duna un bestia un bon bibá si bo no sòru pa e espasio kaminda e tin ku biba aden no ta adekuá p’e. Anto esei ta distinto pa kada un tipo di bestia. Profundisá bo mes den e tamañonan di e kouchi di galiña, profundisá den e espasio ku un prikichi òf lora mester. Duna un kabai espasio pa e por move i no lag’é para henter dia den su stal òf mará na un palu. Anto kòrda tambe riba e seguridat di e bestia, no tin nada skèrpi den e espasio, no tin nada ku ta krese ku ta venenoso? E kuido di bestia tin su responsabilidat kuné, responsabilidat di un bon kuido riba tur tereno.

©Rescueracao, credits translation Denice Bezemer

Advertenties