Aha esaki ta un simpel lo bo pensa, libertat di hamber i set….Di mes e prinsipio básiko ta simpel. Sòru pa tin sufisiente awa i kuminda. Un bestia no ta intenshoná pa sinti hamber i semper mester tin akseso na awa limpi i fresku pa e bebe. Un bestia no ta intenshoná pa ta kana buska kuminda riba kaya. Un bestia no ta intenshoná pa ta asina flaku ku kasi e ta dal abou di miseria. Asina simpel pero tòg e kos aki ta sosodé den hopi kaso.

img_2685

Lokual ku ta hasi e kos aki kompliká ta ku kada un sorto di bestia tin nesesidat di sierto kuminda spesífiko. Komo e doño ta di suma importansia pa bo a informá bo mes den esaki. Pa bo ta dun’é aparte di sufisiente kuminda e kuminda adekuá tambe. Kuminda ku ta kumpli ku tur norma di alimentashon ku e bestia tin nesesidat di dje. Desbentaha ta ku tin masha hopi tipo i sorto i marka di kuminda. Sierto barata i otro asina karu ku apénas bo por paga pa nan. No ta asina ku karu semper ta e mihó, òf un marka di kuminda ku bo ta mira na televishon ta esun adekuá. Marka den mi bista no ta tantu importante. Importante ta e balansa adekuá. Tin hopi kachó ku por ehèmpel ta haña solamente aros pa kome, tin ora ku un tiki kuminda di kachó di bleki aden, pero hopi bia esaki no ta ni e kaso. Tin hopi kachó ku ta haña solamente sobrá di kuminda kayente pa nan kome. Tristu ta ku esaki no ta sufisiente ku tin komo konsekuensia ku aparte ku nan no ta haña sufisiente kuminda, nan no ta haña sufisiente nutrishon pa nan por ta salú.

E kurpa di un bestia ta funshoná meskos ku esun di nos. Si nos no haña sufisiente nutrishon i esnan adekuá, nos ta bira malu. Nos ta bira suseptibel pa malesa i nos sistema imunológiko ta baha. Si nos kome salú i nos haña sufisiente nutrishon nos kurpa ta salú, nos ta sinti nos mihó i mas fet i nos ta ménos suseptibel pa malesa ku ta keda okashoná pa vírus i otro malesa.

Sea kritiko di lokual ku bo ta duna bo bestia, sòru pa bo ta sufisiente informá di e nesesidatnan di bo bestia.

Algun ehèmpel simpel.

Un lora no tin sufisiente nutrishon ku solamente e simianan brua ku bo ta kumpra na kualkier petshop, mas ainda, si bo dun’é esaki so e ta bira malu. E por haña daño sustansial na su igra i nir. E ta muchu vèt i e ta muchu meskos tur dia, ni maske e ta mustra pa bista masha varia i dushi. Un tipo di kuminda spesial “pellet” pa lora tin hopi bia mas nutrishon balansa solamente si e no ta kontené muchu agregashon di entre otro suku i koló artifisial. Tambe nan tin e nesesidat di fruta i berdura fresku. I bo ta hasi nan masha felis si bo skonde nan kuminda pa asina nan por ekspresá nan mes di un manera natural manera nan a kustumá di hasi esaki den naturalesa. Riba Internet tin diferente buki di kushina ku algun reseta tremendo spesial pa e tipo di bestianan aki. Tambe bo por haña informashon aki riba di e diferente “korrels/pellets” ku tin na benta. Pa bo por krea un bon dieta pa bo lora ta algu ku ta eksihí hopi mas atenshon ku na promé instante bo ta kere.

Un pushi no tin sufisiente nutrishon na e ratonnan ku e ta mata i mester di kuminda pa pushi i kuminda fresku (di bleki) pa e kome. Bo tin miedu ku bo pushi ta stòp di kohe raton? Esaki no tin mag di ta un motibu pa laga bo pushi ta sufri hamber. Un trampa pa raton i tene bo besindario limpi ta duna mihó efekto ku un pushi.

Un kabritu, kabai òf baka no tin sufisiente nutrishon na e lokual e ta topa den su kaminda so. Kòrsou ta un isla seku i no tin sufisiente kuminda pa asina por mantené un peso salú. Mester duna nan kuminda adishonal.

Bo mes por kushina pa bo kachónan, pero bou di e kondishon ku bo ta tene kuenta ku e nutrientenan ku nan mester haña. Pa ta honesto, no ta fásil pa bo kushina kuminda salú pa un kachó i ta relativamente karu i bo mester ta bon informá pa bo hasi e kos aki. Tin hopi manera, manera menshoná anteriormente, pa duna bo kachónan kuminda. Esun ta opta pa traha un menú e mes pa su kachónan ku karni i berdura fresku, esaki nos ta yama BARF òf KVV. Tin otro ku ta preferá di kumpra kuminda kla prepará kaba. Atrobe mi ke pone bon kla, mi no tin un preferensia kua tipo di kuminda bo skohe. Bo tin ku skohe lokual ku ta pas serka bo, basta bo tene kuenta ku e nesesidat di bo kachó i pa e haña e nutrientenan nesesario. Serka un mayoria di bestia ta konta ku nan sushi ta duna indikashon ku e kuminda ku nan ta kome ta adekuá i ta duna un bon salú. Sí bo kachó su sushi ta “fluffy” i ta trata di hopi sushi, e ta indikativo pa e kantidat di nutriente ku su kurpa no a apsorbé bon. Esei ta indikashon ku e kuminda ta konsistí mas di kosnan pa yena (maishi por ehèmpel) ku nutriente. Aki tambe ta trata di informá bo mes promé, no bai tras di e papiamentu bunita djis pa bende òf tras di e pakinan bunita i invertí di un manera adekuá pa salú di bo kachó.

©Rescueracao, credits translation Denice Bezemer

Advertenties