Libertat di angustia i stress, un konsepto amplio ku konosé hopi faseta. Un bestia ku ta eksperensia strès òf angustia no ta felis. Angustia i strès tin un efekto físiko i síkiko riba e bienestar di e animal. Bestianan ku kontinuamente ta eksperensia strès òf angustia por bai demostrá esaki den nan komportashon manera outomutilashon (herida nan mes), tin ehèmpel di kachó ku ta morde nan mes pata òf ta pluma nan rabu òf tin lora ku ta pluma nan kurpa.

DSC_1992

Pero tambe kachónan ku ta grita dimas òf ku ta kana kontinuamente den e mesun rònchi por ta un manera di manifestá strès. Esaki ta bin komo ku nan ta eksperensia e strès i nan mes no por hasi nada pa trese un kambio na e situashon aki. E frustrashon ta bira di tal índole ku nan ta buska algu pa deshasí di e strès. strès i angustia por tin diferente kousa. Ata aki algun pa duna bo un idea:

  • Soledat, mayoria bestia ta gusta di ta den kompania di otronan di su mes sorto i ora e ta so e ta haña strès. Tambe falta di kontakto ku hende ta duna strès. Sera un kachó su so den un hòki òf mara na un kadena i ta dun’é solamente kuminda no ta bon, un kachó ta un bestia sosial i ku tin nesesidat na kontakto ku otro. Un kabai su so tampoko no ta bon, ta bestianan ku a kustumá di biba den grupo i ta sinti e nesesidat di ta huntu ku otro pa e sintié seif. Un lora su so den un kouchi no ta bon, lora ta bestia ku a kustumá di tin un partner fiho i ta biba den grupo i huntu ku su partner.
  • Mal nutrishon/òf muchu tiki kuminda ta duna strès. Mal nutrishon pasobra e ta pone sinti su kurpa malu, muchu tiki kuminda pasobra ora e tin ku kompartí e kuminda ku otro, ta okashoná bringamentu. Pero tambe e nesesidat di ta en buska di kuminda i hamber ta duna hopi strès.
  • strès okashoná pa e mal alohamentu. Kada bestia tin su kondishonnan pa loke ta trata su bibienda. Un kabai ku henter dia ta para su so den stal ta eksperensiá strès, e no por yega na su nesesidatnan di bida pasobra e no por move, e no por kome yerba fresku i no por kumpli ku su debernan sosial manera kuido di otro su lana. Un kachó mará òf den hòki henter dia ta eksperensia e mesun kos, e no por pèrdè su energia i e no por ekspresá su mes manera su komportashon mester ta normal ta frustra i ta bai komportá su mes malu. Mayoria bia un kachó ta bira agresivo. Nan ta grita i yora hopi, bula kontinuamente òf ta kana kontinuamente den rònchi. Sierto kachó a pèrdè speransa i ta drumi sin niun ekspreshon ta warda dia pasa pa kaba. Loranan den kouchi muchu chikí sin nada di hasi, ni ko’i hunga i sin e posibilidat di buska kuminda ta hopi infelis. Imaginá bo….bo por pensa manera un mucha di 7 aña anto bo ta 30-40-50 aña sera den solitario kaminda bo no por ni span bo alanan anto bo no tin nada di hasi….Lo bo ta felis? Animalnan por sinti strès tambe si nan ta muchu hopi den un espasio muchu chikí. Superpoblashon tambe ta duna strès meskos ku soledat.
  • Miedu pa motibu di mal sosialisashon, òf miedu di hende pasobra nan ta tenta bo, bati bo òf grita bo, miedu pasobra e bestia no ta komprondé kiko ta spera di dje pasobra komo hende nos ta buta nos kondishonnan pa e bestia, miedu pa motibu di training robes/pisá, miedu pa doló pasobra tin ora ta hasi uzo di método ku ta hasi e bestia doló pa asina logra nos meta. Miedu pasobra no tin kaminda pa skonde pa e lokual ku bo tin miedu di dje òf miedu pasobra bo tin ku biba ku otro tipo di bestia ku den naturalesa ta bo enemigu.
  • strès pa motibu di desabilidat, strès pa motibu di doló i strès pa motibu di malesa òf yen bestia riba bo ku ta duna bo kishikishi.

Manera bo por nota tin hopi faktor ku por duna strès òf angustia. Realisá bo mes ku e enumerashon aki no ta kompleto. Nos a trata di trese un tiki klaridat den e kousanan di strès òf miedu pero e tópiko aki ta hopi amplio pa duna un bista kompleto. Importante ta pa bo puntra bo mes “mi animal ta felis i su bibienda ta kumpli ku su normanan di biba den naturalesa si e no mester a biba den un kouchi òf “kennel”. E por hasi eskoho manera e ta bibando i e ta sinti su mes seif. Mi ta mira señal ku por ta indiká strès òf miedu anto mi sa serka e sorto di bestia ku mi tin kiko e señalnan aki por ta? Kiko mi por hasi pa evitá esakinan? Profundisá bo mes den bo animal doméstiko i buska informashon. Wak riba Internet, den biblioteka i pidi profeshonalnan pa konseho. Dikon no puntra ken ku ta? Tin hopi kuenta di gañagaña i tin hopi teoria antaño. Tambe bienestar di bestia ta un tópiko ku ta hopi den movishon ku desaroyonan nobo. Algu ku 30 aña pasa tabata komun i koriente por a kambia den transkurso di tempu despues di estudio. Supuestamente e profeshonalnan ta na altura di e desaroyonan nobo i ta sigui desaroyá nan mes riba nan tereno. Pero tambe pensamentu lógiko i salú lo por yuda bo pensa pa bo mes “kon ami lo haña e kos aki si ta ku mi e kos aki pasa” esei mes por ta un indikashon pa bo….Pa ilustrá ku un bon ehèmpel semper mi ta hasi uzo di esaki….na momento ku nos siña nos yunan kon pa evitá ku nan ta susha nan mes ora nan tin ku hasi nan nesesidat, nos ta duna nan kòmplimènt i steker pa kada un bia ku nan a hasi uzo di wc. Ora nos kachó chikí hasi su nesesidat un bia paden miéntras nos ta train e pa e hasié pafó nos ta bai puntra nos mes kon pa nos straf e i tin hende ku te hasta ta pone nan nanishi den nan pishi…Ta algu pekuliar pasobra lo bo hasi esaki serka bo yu tambe? No ta lokual ku mayoria ta kontesta. Mi kontesta tambe semper ta no, awèl esaki ta konta pa e kachó tambe. ­Un otro ehèmpel simpel…Tempu nan aya ora di siña landa tabata hasi uzo di e método ku ta pega un mucha na un hak anto hisa benta bo na awa. Hopi bia esaki tabata un eksperensia troumatiko pa e mucha. Awendia ta laga e muchanan kustumá promé ku e awa dor di hunga ku nan den awa den e “kikkerbad” promé ku bai ku nan den awa. Kua di e métodonan aki lo bo gusta mas? Esun ku ta obligá bo òf esun ku ta bai mas trankil i ku ta mas opvio? Esakinan ta algun ehèmpel simpel ku semper bo por hasi uzo di dje pa puntra bo mes kiko lo bo mes lo preferá i kon pa atendé ku sierto asuntu. Komprenshon, rèspèt i un manera salú di identifiká bo mes ku e situashon.

 

©Rescueracao, Credits translation Denice Bezemer

 

Advertenties