Linfoma serka pushi

Kanser ta algu ku bo ta topa serka tur ser ku ta biba. Inkluso nos bestianan doméstiko. Kanser ta originá di un sélula ku ta kambia i ku ta multipliká fuera di kontròl. Esaki ta algu ku por sosodé tur kaminda den e kurpa, pero na sierto kaminda e ta frekuentá mas ku otro. Serka pushi e kanser ku ta paresé mes ta e Linfoma. Esaki ta un kanser di e sistema di defensa. Esaki por sosodé na diferente parti den e kurpa i ta asosiá tin biaha ku sierto infekshon viral serka pushi.

DDC_cat_mutual_grooming
FeLV ta keda transladá pa medio di skupi. (Orígen: www.merckvetmanual.com)

E diferente formanan di Linfoma por keda repartí segun e kaminda ku nan a originá den e kurpa. Esunnan ku ta paresé mas bia ta esnan ku ta den e sistema di stoma i tripa, e ora ei nos ta yama nan alimentisio. Un otro forma ta esun mediastinal Linfoma, esaki ta originá den e klirnan den e kavidat torásiko. Si e igra, bòfi, glándulanan i/òf e manteka di wesu ta afektá nos ta papia di Linfoma multisentral. Esnan ku ménos bo ta topa ta esnan ku ta originá den e wowo, nir, den e sistema di nervio i kontrali na kachó e kueru.

Linfoma por originá a konsekuensia di un infekshon ku e víres di leukemia felin (FeLV). Esaki ta un víres ku por keda transladá via di e skupi i pa medio di e segregashon di nanishi i tambe via di mordé. Ora ta trata un infekshon por tin 3 senario: e pushi por kombatí e infekshon i bira imun; e bestia por bira un pushi kontaminá pero salú sin ku e mes tin niun síntoma, pero e por kontaminá otro pushi sí ku e víres; òf e pushi por bira malu. Ora e bira malu bo ta mira ku su sistema imunológiko ta baha, bo ta mira ku su sanger ta baha kada bes di nobo i Linfoma.
E síntomanan di Linfoma por varia dependiendo di e lugá kaminda tin e tumor. Serka e forma alimentisio bo ta mira síntoma ku tin ke haber ku e sistema di stoma i tripa. Esaki por ta sakamentu, habrimentu di barika, e ta bira flaku i e por stòp di kome. Tin bia e tripanan no por hasi uzo di e alimentashon i generá esaki den e kurpa di tal manera e kurpa no ta haña sufisiente nutrishon. Esaki por kondusí na defisiensia den e kurpa.
Serka e forma mediastinal, ku ta originá den e kavidat torásiko, por surgi problema ku e respirashon.

RX thorax lymphoma
Potrèt ku rayo X di a kavidat torásiko. Por mira un masa dilanti den e kavidat i tin líkido entre di e pulmon i e rant di e pechu a konsekuensia di e Linfoma. (Orígen: www.vetbook.org)

E bestianan aki tin ku hasi hopi esfuerso pa nan por haña rosea paden. Tin biaha bo por mira ku e slijmvlies ta bira manera blou a konsekuensia di e kantidat abou di oksígeno ku tin den e sanger. Otro problema ku por keda registrá serka e forma di kanser aki ta akumulashon di líkido den e kavidat torásiko i tambe regurgitashon. E último aki ta sakamentu di e kuminda promé ku e yega e stoma. Pa hopi hende e ta mustra manera ta vomitá e bestia ta vomitá, pero pa por haña e motibu ta bon pa sa e diferensia. Regurgitashon ta sosodé manera e kaba di kome, e bestia no ta sinti ku e ta bai saka i bo ta mira ku e barika ta trèk masha pisá pa e saka. Si tin duda ku ta trata di vomitá òf regurgitashon e veterinario lo por puntra bo pa sea film’é òf pa bin dun’é kuminda serka dje na ofisina.
E linfom multisentral ta duna kehonan vago òf tin ora nada di keho. Esaki ta dependé di e seriedat di infekshon di e órganonan afektá. Ora e veterinario saminá e kurpa di e bestia i por sinti e glándulanan hinchá. Si e igra, bòfi òf manteka di wesu ta afektá e síntomanan ta varia di sakamentu i no kome te ku e kurpa no tin grasia i ku e ta alehá su mes. Si bo ta duda semper ta bon pa konsulta ku un veterinario.
Dependiendo di e kehonan e veterinario probablemente lo proponé pa sigui hasi mas investigashon. Esaki por enserá saka potrèt di rayo X di e pechu i/òf barika, hasi un echo di e órganonan den barika òf e por laga hasi un saminashon asina yamá sitológiko. Ora di hasi saminashon sitológiko e veterinario ta hasi uzo di un angua pa saka algun sélula di e material ku e ke saminá pa laga investigá. Por ta trata di un klir ku ta hinchá òf por ta trata di e líkido ku tin den e kavidat torásiko. E sélulanan aki ta pone riba un glas kaminda ta agregá un líkido di koló. Esaki ta keda saminá bou di un mikroskop. Hopi bia esaki por kondusí na e diagnostikashon di Linfoma.
E tratamentu di Linfoma ta dependé atrobe di e lugá i di e grandura di e tumor. Eliminá kirúgikamente un pida di e tripa afektá òf un bulto na e kueru por duna sanashon tin bia. Un otro opshon por ta kimoterapia. Esaki por spanta hopi hende, pero ta importante pa sa ku kimoterapia ta dirigí pa drecha e kalidat di bida serka e bestia. Si tin hopi side effect por adaptá e protokòl òf por stòp ku e terapia. Tin posibilidat di diferente remedi den diferente kombinashon. Si akaso e kimoterapia no ta deseá por trata e bestia ku prednison pa asina e por biba un temporada kòrtiku pero felis i sin doló. Ta importante pa sa ku e tratamentu ku prednison promé ku kuminsá ku e kimoterapia por baha e efekto di e kimoterapia. Esaki ta nifiká ku bo mester sòru pa bo ta sigur di e tratamentu ku bo ta skohe pa bo bestia promé ku bo kuminsá ku e tratamentu ku prednison. Mihó ta pa bo konsulta ku bo veterinario pa skohe e mihó opshon pa bo bestia.

E informashon aki ta intenshoná pa hasi uzo di dje promé, durante òf despues di un konsulta serka e veterinario. Na e informashon for di e página aki no tin niun derechi mará. Ni maske e informashon ta skirbí pa un veterinario e por kontené fayo. Niun wepsait no por remplasá e kontakto òf bishita na un veterinario. Ora bo ta duda, tuma kontakto ku un veterinario!

©Rescueracao MS, translation DB