Kachó i vürwèrk

Oké, sera bo wowo i purba na imaginá bo den e siguiente situashon. Bo ta kanando bo so den skuridat riba kaya. Bo tin un sintimentu straño, tin un holó skerpi ta rondoná bo i tin un zonido manera di bos den distansia. Bo no sa kiko eksaktamente bo ta eksperensia, pero bo ta rekonosé si komo algu di hopi tempu pasá. Pero kiko e ta eksaktamente bo no ta kòrda. Ora pa ora bo ta haña mas miedu, komo si fuera un momento pa otro algu malu ta bai sosodé, tin peliger den aire. Bo ta mira lus ta flèsh, bo ta tende un zonido fini i skerpi sigui pa zonido di eksploshon, kompaña pa un holó di kimá ku ta plama djis despues. Bo no por komprondé di unda e ta bin òf kiko e ta. Preferiblemente bo ta skonde, pero bo no por, no tin kaminda pa bo skonde ku bo ta sinti bo safe. Unda ku bo bai bo ta sinti, mira i hole e kos aki tur kaminda. Bo ta purba hui i den bo pániko bo ta subi kaya, pero e ta tur kaminda. Mare bo por a sinti bo mes safe un kaminda, pero bo tin asina tantu miedu ku bo no por skapa di dje…..

Bestia tin hopi miedu kon ku bo mir’é di vürwèrk. Nan lo preferá di skonde te ora tur kos pasa.

Tin hopi kos skirbí òf ku bo por buska riba Internet. Tin tur sorto di kos di lesa kon pa kuminsá train e kachó na tempu i kon pa hasi nan ménos sensibel paso a paso pa e zonido i kon ta rekondishoná bo kachó pa vürwèrk. E training no ta solamente basá riba kustumá e kachó ku zonido sino mas pa e siña asosiá e zonido ku un sintimentu distinto. Si bo kuminsá adelantá ku e training, un 2 pa 3 luna promé, bo por pasa komienso di aña di un manera muchu mas fásil pa bo i bo kachó. Pero kiko awor si niun di e kosnan aki no a tuma lugá? Òf si bo haña un kachó nobo ku a bin ku su miedu pa vürwèrk kaba den su kurpa? Kiko lo bo por hasi?

Tep en general

  • No fòrsa e kachó pa bai pafó pa asina e kustumá ku vürwèrk. Ta mas miedu lo e haña, pasobra e ta asosi’é ku un eksperensia negativo ki ora ku e spanta di un zonido duru.
  • Purba na evitá e zonido duru mas tantu ku ta posibel tene bo portanan i bentana será, baha òf sera bo kortinanan i toka muzik pa kamuflá e zonido.
  • Purba di no saka e kachó for di e lugá kaminda el a bai skonde tampoko strob’é di bai ora e ke bolbe bai einan bèk. Akinan e ta sintié bon i asina e por purba na mengua e spantu ku e ta sinti.
  • Laga e kachó drumi serka bo si esei ta kalm’é. Dun’é e sosten ku tantu e ta anhelá.
  • Krea un espasio p’e kaminda e ta sintié sigur. Ora e kachó haña un lugá di skonde kaminda e ta sintié bon, purba na hasi e lugá aki mas agradabel ku ta posibel p’e. Sòru pa e intensidat di e vürwèrk (zonido duru, lus di vürwèrk) mengua mas tantu ku ta posibel aki nan dor di hasi e espasio mas skur ku ta posibel hasiendo uzo di deken, esta evitá lus di pafó pa drenta paden. Dun’é un paña di bo ku tin bo holó n’e i sòru pa e kachó por bandoná e lugá aki di un manera fásil ora e ta deseá esaki. Pone kualkier kos deken abou den kua e kachó por bai skonde i sera e kortinanan i sende lus i pone muzik toka pa kamuflá e zonido pafó.
  • Wak pa bo kachó tin un banchi ku bo number di telefon nota parti paden òf riba dje asina si akaso bo kachó hui esnan ku top’é lo por logra drenta den kontakto ku bo.
  • No laga kachónan pafó mará òf den un kouchi. Lo no ta promé bia ku un kachó ta horka su mes di tal forma ora e drenta pániko na su mes kadena òf ku tin hende ta tira vürwèrk pa malu riba su kouchi.
  • Duna nan algu di kou riba dje, ora kachónan ta kou nan ta bira trankil. Dor di kou nan ta produsí dopamina i endorfina, un supstansia ku ta trankilisá nan, ku nan ta bira kontentu di dje i ku ta relahá nan. Un wesu traha di kueru di bisòn lo ta ideal.

E kachónan aki hopi bia ta haña di un veterinario un kombinashon di píldora ku ta kontené acepromazine, manera Vetranquil/ sadalin. E remedinan aki ta pone su múskulonan bira slap ku ta duna e impreshon ku e kachó ta trankil. Lástimamente esaki no ta e kaso. Bo kachó ta skucha tur kos, pió ainda Vetranquil ta reforsá e zonido, e kachó tin yen miedu ainda pero solamente e no por hasi nada. Ademas di esei acepromazine por baha e preshon i por kousa hipotermia. Bestianan ku ta sufri di epilepsia i/òf kurason no tin mag di uza acepromazine. imaginá bo, bo tin miedu di araña anto tin un djis serka banda di bo i bo kurpa no ta funshoná ku bo por kore bai. Pruebá ta ya pa algun aña kaba ku e produkto aki no ta e solushon pa e problema aki e ta empeorá mayoria bia.

Un otro desbentaha ta ku e dianan promé ku tiru bo no ta bai duna bo kachó kos kontra di e spantu, bo no por ta droga bo kachó 5 dia sigui.

Pa kachónan mas bieu e no ta apropiá. Ta un lamento ku no ta bai mas ku e tempu i ku ta preskribí e produktonan aki ainda na gran eskala aki. Un bon alternativa hopi bia no ta keda ofresé. Danki Dios hopi hende tambe a kuminsá ofresé resistensia kontra di e produktonan ku ta funshoná asina i ta buska alternativa. Danki Dios tin algun veterinario ku ta ofresé otro produkto ku ta traha di un manera mas agradabel.

Un alternativa ora di trata atakenan di pániko diripiente ta diazepam (valium). Diazepam tambe ta pone e kachó bira sùf, pero ta baha e spantu sin ku e bestia ta bira mes sensibel pa zonido. Paga tinu e produkto aki ta duna soño.

Side effect di diezepam: e ta suak e múskulonan, e ta habri apetit, e ta agitá e bestia (paga masha tinu ku bestianan agresivo! Sí dun’é e produkto aki e por duna un resultado indeseá) i ora hasi uzo di dje pa un temporada largu (3- 4 siman) adikshon por presentá. No duna bestianan ku tin problema ku igra òf nir e remedi aki. Ora hasi uzo di dje pa un temporada largu e por resultá di ta un dañino pa e igra i nir. Pero e ta un mihó alternativa ku acepromazine.

Awendia Alprazolam ta e remedi ku ta keda rekomendá pa uza kontra di angustia pa vürwèrk.  E ta mengua spantu i ta pone e kapasidat pa siña baha un tiki. Esei tin komo konsekuensia ku un eksperensia ménos agradabel no ta keda registrá di un manera kla ku e ta keda registrá komo un eksperensia negativo. Bo por kuminsá dianan adelantá ku e produkto aki pa asina segun ku e dia ta yega serka e eksperensi’é mas trankil. Esaki ta hopi útil pa kachónan ku tin hopi miedu i por uz’é mayoria bia tambe serka kachónan bieu. Kòrda konsulta den un situashon asina ku dòkter. Pa un mihó resultado ta bon pa kuminsá 1 te 2 dia promé ku Alprazolam. Pero en general e ta funshoná sufisientemente bon si dun’é riba e dia ei so. (veterinario de Geus).

Si bo tin un kachó ku ta bira nervioso pero no tin masha miedu, lo bo por skohe pa “composure pro”, un kuki ku ta kontené algun materia ku ta pertenesé na nan kurpa i ku ta pone nan bira trankil. E produkto aki tambe ta kos ku por duna nan pa un temporada mas largu pa asina e periodo ku ta kondusí na aña nobo lo por ta mas agradabel. (veterinarionan Ronde Klip)

Pa duna nan ainda mas e sintimentu di seguridat bo por hasi uzo di Adaptil esaki ta un aparato ku ta saka damp ora bo hink’é den stòpkontakt serka banda di kaminda e kachó ta preferá di ta ora e ke sintié safe. E ta repartí feromon ku tin un efekto trankilisante lokual ku ta mengua e reakshon di spantu i miedu drástikamente.

E “Thundershirt” ta algu ku un grupo grandi di kachó ku hopi miedu ta konsiderá agradabel. E ta duna nan e sintimentu di seguridat (veterinario de Geus)

Thundershirt_Hond

Si akaso bo no por logra haña e thundershirt original pa bo kumpra bo por traha un bo mes ku rekverband komo alternativa ku tambe ta traha.

12246931_10153720666847748_2014565803708230941_n

Tambe tin “bachboesemremedies” na benta ku tambe lo mester yuda. Bach rescue ta e produkto mas uz den e situashon aki. Mi mes no tin masha eksperensia ku e produkto aki, pero mi ta tende ku regularidat di su efekto positivo ku otro ta eksperensiá kuné, pa e motibu ei mi ta konsider’é komo un produkto di menshoná aki tambe.

Bo por hunga un wega ku yama “cheesespel” kuné pa hasi e vürwèrk un tiki mas agradabel pa e kachó. Esaki por solamente si e kachó no ta ankrá kaba den su angustia di vürwèrk i ta dispuesto ainda na kome algu i hunga ku bo.

cheesespel

Si akaso bo topa un kachó/pushi òf bo a pèrdè un kachó/pushi, e mihó kos ku bo por hasi ta mèldu esaki na asil (+599 9 465 4307
info@dierenbeschermingcuracao.com) i riba Facebook  na Curacaopets Lost and Found ophttps://www.facebook.com/curacaopets.lostandfound?fref=ts?

Pa e aña benidero bo por bai hasi uzo di Zylkene, e tin mester di 1- 2 luna pa e tin su efekto pero e lo duna bo un bon sosten den e programa di rekondishoná bo kachó. E ta un suplemento di kuminda ku ta kontené e supstansia alfa-casozepine, e ta un struktura di proteina ku ta baha hansha, i ta duna un efekto di kalmante. E ta yuda bestianan di kas pa adaptá na kambionan den nan situashon doméstiko.

Clomicalm tambe ta un remedi hopi uzá i adekuá ku ta yuda pa rekondishona bestia. Pa esaki tambe ta konta, kuminsá hopi tempu adelantá kuné. Sigur 2 luna promé ku fin di aña, preferibel te hasta promé

©Rescueracao, translation Denice Bezemer. Find us @Facebook