Yu di kachó 5-8 siman

Na final di e di 4 siman i komienso di e di 5 siman di bida di e yu di kachó nan ta bira mas fásil pa mantené en komparashon ku esnan di mas chikí. Pero e no ta ménos intensivo sí.

Jerommeke 4 siman, yuchi chiki

For di e di 4 siman bo por kuminsá sosialis nan ku koutela na mas kos. Pero kòrda si ku aki tambe ta konta ku tin ku hasi tur kos di un manera trankil anto pa un tempu kòrtiku, sigur den komienso. No eksihí muchu di nan. Algu simpel di hunga i karisia ya ta sufisiente ora nan tin 4- 5 i 6 siman.

Den e di 6 siman nan ta haña nan promé angua i despues segun e skema di e veterinario. Mayoria bia esaki ta konta pa dia nan tin 6- 9- 12-15 siman. Di e promé ènter nan por bira un tiki malu. Mayoria bia e dia ku nan a pasa angua i e siguiente dia pero no mas largu. Tin bia nan ta bira hopi malu despues di e promé angua, mayoria bia e lokual ku ta okashoná esaki ta Parvo. Esaki hopi bia tabata presente kaba den su sistema skondí i ta keda aktivá despues di e promé angua. No ta asina ku no por salba un yu di kachó ku ta infektá ku Parvo, pero e ta un trabou hopi intensivo.

Tene kuidou pa e no muha sigur despues di un ènter esaki no ta rekomendabel. Nan resistensia ta hopi limitá despues di un ènter i nan ta mas vulnerabel pa malesa.

Kuminda

Ora nan tin mas o ménos 4-5 siman bo por kuminsá duna nan kuminda di kachó seku ku bo a muha. Promé bo tin ku machik’é pa e bira un papa i tiki tiki ta introdusí nan na pida nan un tiki mas grandi. Bo ke fasilitá bo mes? Hasi uzo di un baki ku bo por sera bon. Pone aden 2 òf 3 porshon di e kuminda seku, añadí hopi awa i pone e baki bon sera den frishidèr. Despues di algun ora bo tin algun porshon di kuminda kla traha pa nan. Ora ta ora di kome bo ta djis repartié den nan baki di kuminda ku un tiki awa kayente, ful’é pa e no ta muchu friu òf kayente i bo ta duna nan. Ora nan tin 6- 7 siman bo por bai over na kuminda seku sin muha promé.

Miéntras e yunan di kachó ta kome kuminda muhá lo bo nota ku nan no ta bebe dje tantu awa ei. Esaki ta pasobra e kuminda ta hopi húmedo. Mas ku klaro mester tin awa fresku semper na nan disposishon. Paga tinu, ku ora nan stòp di kome kuminda muhá nan tin nesesidat na hopi mas awa.

Ki ora e yunan di kachó por bai for di nan nèshi?

Jerommeke 8 siman, kla pa bai

Tambe ora no tin mama presente, ta mihó tene e yunan di kachó huntu te ku nan di 8 siman. Esaki ta di suma importansia pa nan desaroyo. Nan a haña un bòfta kaba pa motibu ku nan ta huérfano i nan mester a sinti falta di e influensia di nan mama. Nan ta siña hopi di otro pa nan por hiba un bida basta stabil despues. Nan ta siña otro ku morde duru ta hasi doló, nan ta siña hunga, nan tin defensa na otro i kalor di otro i e kos di mas importante… Nan sistema di nervio mester madurá. E proseso aki ta dura te den nan di 7 siman. For di estudionan a resultá ku esaki ta madurá solamente miéntras nan ta huntu. Si bo saka e yu di kachó promé for di su nèshi e por hañ’é ku problema despues. E sistema di nervio no por kaba di desaroyá i te hasta e por haña sikatris na final di e sistema di nervio.

Hmmm mi ta tende bo pensa…I kiko awor? Nos a nota ku un parti di e yunan di kachó aki ta hopi instabil despues. No tur, pasobra nos a mira kachónan ku a lanta ku bòter ku a bira kachónan salu i masha agradabel despues. Pero ei mes tin algun ku despues tòg a haña problema. Si bo ta interesá pa lesa mas tokante di e tópiko aki, bo por wak riba:”Yu di kachó i bandonamentu di e nèshi promé ku ora” aki bo por haña informashon amplio.

E dia di bandoná e nèshi a yega

Hunga pafo por kansa bo hopi

8 siman, e dia a yega. Si tur kos a bai segun deseo tin hopi doño nobo i e yunan di kachó por muda. Laga e doñonan nobo bin for di mainta pa bin buska e yunan di kachó, asina e yu di kachó tin henter dia pa e adaptá na su situashon nobo, esaki ta duna nan mas sosiegu promé ku nan tin ku bai pasa anochi. Duna nan e buki di ènter i algu di nan mes kuminda. Preferibel laga nan duna nan e mesun marka di kuminda ku nan a kustumá kuné den komienso i den su nèshi. Dor di e mudansa e resistensia por baha i bo ke evitá habrimentu di barika. Bisa bon kla ki dia e tin ku haña tratamentu kontra di bichi i ki dia e tin ku bolbe bai pasa angua. Un otro un tep balioso, no duna ken ku ta bo yunan di kachó. Wak bon ken bo ta duna. Wak si bo ta nota kompashon, kon nan ta kue e yu di kachó, nan ta trat’é ku amor, nan ta tene kantu di nan kurpa? Bo sintimentu ta bon òf bo ta duda? Si akaso bo ta duda semper skucha kiko bo sintimentu ta bisa bo i trata na papia tokante di dje ku nan. Niun hende no tin benefisio for di “mismatching”. Sigui informá, ki tipo di kachó boso ta buska, kon e situashon na kas ta, nan ke un yu di kachó aktivo òf netamente un kachó trankil i tímido ku kisas ta pas mihó den nan situashon. Semper mi a duna konseho tokante di kiko si lo pas òf lo no pas ku otro, kon e karakternan ta, ku nan ta malamucha òf ku nan ta chocho. Sea honesto i pone bon atenshon, esaki ta masha importante. Si una bes bo a sinti ku e no ta bai bon, lo bo mira ku bo tabata tin rason. Hendenan a yega di trese e kachónan bèk pasobra kos no tabata bai bon. Mi a yega di nenga hende pasobra for di e promé momento kaba nan a mantené distansia ora nan a kue e kachó i nan no a trat’é ku amor. Ora mi a sigui puntra a bin resultá ku nan ta kla pa laga kòrta su oreanan pasobra e ta mustra mas tòf asina. Abo ku a pasa den tantu kos ku bo chikínan ta defendé nan i tin ku opservá hendenan masha bon. Bo no a hasi tantu kos i duna nan amor i kariño pa despues bo mira nan bira infelis.

©Rescueracao 2020