Yu di kachó 0-4 siman 

Alohamentu di yu di kachó resien nasí

1 dia bieu

Ku regularidat ta buska hende pa kria yunan di kachó ku no tin mama mas ku ta mas yòn ku 8 siman. Mayoria hende ta dùrf di tuma un yu di kachó ku ta entre di 6 8 siman. Pero tin un tiki miedu di kria  esnan resien nasí. Esaki ta algu komprendibel pasobra nan ta hopi vulnerabel. Bou di e kapítulo aki bo por haña informashon tokante di tur tipo di asuntu ku ta importante ora bo ke kria yu di kachó. Esei ta hasi e krio di esnan mas chikí tambe algu agradabel pa hasi.

Sosiegu, òrdu i limpiesa

Eefje 10 dia bieu

Tur kos ta dependé di e 3 kosnan aki, sosiegu, òrdu i limpiesa. Yu di kachó te ku mas o ménos 4 siman mester drumi, drumi hopi. Nos tin e maya di kue nan i karisia nan, pero di mas tampoko no ta bon. Esaki ta stimulá nan muchu lokual ku ta hasi nan kachónan nervioso. Durante di e periodo di 0-3 siman úniko kos ku tin ku sòru p’e ta ku nan ta bebe kada 2-3 ora, pupu i pishi, limpia nan i bolbe drumi. Esaki ta e úniko kos ku mester hasi ku nan komo hende. Despues di 3 siman bo ta nota kambio di mes i nan lo bai eksplorá mundu rondó di nan. E ora ei a bira e momento pa tiki tiki stimulá nan un tiki mas, pero no lubidá ku aki ta trata ketu bai yu chikí ku mester di hopi sosiegu.

Duna kuminda

E kuminda korekto ta masha importante. Te ku 4 siman tin ku duna nan solamente lechi spesial pa yu di kachó. Pa e lechi korekto tin ku kumpra e lechi pa yu di kachó na bleki ku veterinario ta bende. E bleki nan ta karu, pero ora bo kere di ta kumbiniente i buska otro bo por haña bo den hopi problema. Esnan mas barata mayoria bia ta duna problema di tripa lokual ku konsekuentemente ta sòru pa gastunan di veterinario. Kuminsá na duna nan kada 2-3 ora bòter. Sòru pa e bòter ta limpi i e chupon tambe sterilisá nan den awa herebé. Traha e lechi segun e indikashon riba e bleki. E promé dianan semper mi ta pone un tiki mas awa aserka pa nan stomanan por kustumá ku e lechi nobo.

Billy 1,5 siman, ora di duna nan bòter mester tene e yu di kachó règt pa e no haña lechi den su pulmonnan.

Traha e lechi kayente i lèk un tiki riba bo pòls pa bo wak si e no ta muchu kayente. E lèk riba bo pòls no tin mag di kima bo ni e no mester ta muchu friu. Asina bo ta mas o ménos riba e temperatura di bo kurpa. No sakudí e lechi pa evitá muchu airu drent’é mihó drei e ku un fòrki. E promé biahanan ku nan ta bai bebe di bòter nan ta haña esaki straño, e no ta smak manera nan mama. Tin bia e promé dia bo tin ku purba duna nan mas bia pa nan por kustumá i bebe sufisiente. Una bes ku nan kustumá bo ta bai na kada 2-3 ora. E lokual ku bo ke mira ta ku nan barika ta bira manera pera. Bo ta mira na moda di papia, nan barika hincha. Un forma di un pera ta un yu di kachó felis. Lokual ku ta importante ta ku ta tene e yu di kachó règt miéntras e ta bebe pa evitá ku lechi ta drenta su pulmonnan. Ke men preferibel no pone bebe drumí riba su lomba. Bo por, si bo tin mas ku un yu di kachó, traha un tiki mas lechi i kompartié ku nan kada un, pone un abou i kue e otro. Asina bo ta kaba mas lihé. Despues di kada un bia ku nan bebe, laba e bòter bon laba i ward’é despues den frishidèr. No bolbe kenta e mesun lechi. Ora nan tin mas o ménos 4 siman bo por kuminsá brua kuminda di kachó seku ku bo a muha den nan lechi ku e ta bira manera papa. Den e siman ei kada bes ta buta ménos lechi. Al final bo ta keda ku un papa di kuminda di kachó. Ora bo ta duna nan e papa aki, di mes mester hancha e buraku di chupon pa e papa por pasa. Na un prinsipio por kuminsá duna kuminda kada 4 ora i por salta e kuminda den mardugá. Tiki tiki por kuminsá varia e kuminda, bòter di papa varia ku kuminda di kachó seku muhá den un baki. Hopi bia mi tabata kuminsá mainta ku e papa di kuminda di kachó despues kada 4 ora un baki ku kuminda di kachó seku muhá. E último kuminda anochi ta konsistí di un bòter di papa atrobe. Oranan fásil pa mantené por ta  6-10-14-18-22 or. Ora nan tin mas o ménos 5 siman 4 bia pa dia kuminda ta sufisiente i bo ta kuminsá ofresé nan tiki tiki kuminda seku. (pa mas informashon wak e kapítulo 5-8 siman).

Pupu, pishi limpiesa i drumi.

Yunan di kachó no por bai af di nan mes. Esei ta algu ku den un situashon normal nan mama ta yuda nan kuné. E ta lembe nan barika te ora nan pishi i bai af. Despues ku nan kaba di bebe lechi na bòter ta importante pa bo imitá e mama. Hopi bia mi tabata hasi esaki tambe un tiki promé ku mi duna nan bòter pa asina krea un tiki espasio promé ku nan bebe i despues di bebe nan bòter mi ta tuma mas tempu pa hasi esaki pa asina nan bai af bon. Bo por hasi esaki ku un pida papel di kushina, papel di WC òf un washandje muhá.

Mi mes ta haña papel mas fásil pasobra esaki bo no tin nodi di laba. Pasa ku kuidou poko poko over di e kaminda e ta pishi i na su buraku di atras mayoria bia ya ta sufisiente pa stimul’é. Esaki ta nifiká ku bo no tin nodi di duna e barika un masashi. Ora nan kaba di hasi nan nesesidat bo ta pone nan bek na un lugá limpi pero fiho di drumi. Kòrda tene kuenta ku e chikínan no por regulá nan temperatura ainda. Un butishi òf bòter yena ku awa kayente bou di un sèrbètè pa nan drumi kantu di dje ta tene nan kayente i ora ta muchu kalor nan por kita for di banda di dje. Tene kuidou ku humedat i trèk (di airu). Despues ta drumi ta ora ta e momento pa e siguiente bòter. Meskos ku yu chikí en realidat….

Tin ora bo tin yu di kachó ku no por bai af bon, esei hopi bia ta un indikashon ku e proporshon entre di lechi i awa no ta korekto i bo por añadí un tiki mas awa aden. Si ainda e no ta bai bon ta bon pa tuma su temperatura. E tèrmometer ta fasilitá e baimentu af. Di mes bo tin ku tene kuenta pa bo no hinka e tèrmometer muchu aden. Solamente e tòp kolo di metal ta sufisiente pa drenta. Ainda e no ta bai bon? Konsulta ku un veterinario kiko ta mihó pa bo hasi.

Enter, bestia i otro tipo di plaga

E promé angua e yu di kachó mester haña ora e tin 6 siman. Despues segun e skema di e veterinario. E yunan di kachó por bira un tiki malu despues di e promé angua.

E mustashi perfekto di lechi

Sa sosodé ku parvo por keda aktivá despues di e promé enter i por hasi nan hopi malu. Esei ta nifiká ku nan tabata tin parvo kaba den nan sistema. Esaki bo ta mira hopi serka e yunan di kachó durante e periodo di áwaseru. áwaseru ta nifiká parvo esaki ta nifiká ku tin ku tene kuidou pa no buta esun afektá ku e otronan ku no a pasa angua ainda òf ku otronan ku ta suak.

Mester sòru pa deshasí e yunan di kachó di bichi ora nan tin 2-4-6- 8 siman, semper buska remedi pa esaki solamente serka e veterinario.

Pruga ta algu ku ta paresé hopi lihé e úniko produkto ku ta safe pa e chikínan ta frontline di spùit. Pero pa esaki tambe ta konta, no hasi di mas i djis hunta e yunan di kachó ku un tiki.

Chupa na (serka) otro

Yunan di kachó sin mama ainda tin e nesesidat di chupa. Den un situashon normal nan lo por satisfasé nan mes ku e punta di tete di nan mama, pero esei no t’ei aworakí. Tin bia nan ta chupa na otro pa nan  satisfasé e nesesidat aki. Tin bia nan ta chupa na otro su ora òf tenchi pero tin bia tambe na otro su partinan íntimo. Lokual ku ta hasi e kos aki mas ferfelu ainda ta ku esun ku ta chupa por haña orina òf hasta sushi di e otro den su boka komo ku sin e por yuda el a stimulá e produkshon di pupu òf pishi, anto e partinan íntimo por hincha lokual ku ta stroba e pishimentu. Esaki ta hinka nan tur dos den un situashon peligroso. Bo por evitá esaki dor di duna nan un tiki mas kuminda pa yena nan barika un tiki mas. Paga bon tinu riba e ora ku tin ku duna nan kuminda pa evitá ku nan ta bai chupa serka otro òf dor di apartá nan na e momento ku nan lanta for di soño ta ora ta ora di duna nan bòter. Un otro kos ku por ta traha na bo desbentaha ta ku nan por susha i bira pega pega di otro su sushi.

Baña nan

En realidat no mester baña nan pero tin ora bo no por otro. Sigur no si nan a susha ku otro su sushi   bo no ke pa muskita buta webu riba nan.

Bo por baña nan si pero bo mester hasié ku masha koutela. Nan por kue friu un be i tambe nan temperatura por baha si nan resultá den trèk lokual ku por hasi nan malu hopi lihé. Si akaso bo tin ku baña nan tòg wak pa e awa ta lou nèt dushi pa un baño. No hasi uzo di shampu. baña nan lihé sin muha e kabes. Esei bo por limpia ora bo ta sek’é. Seka nan masha bon mes i keda frega nan te ora nan ta bon seku. Despues meskos ku serka un yu chikí, lora nan den un deken bon kayente i kualkier kos buta un butishi. Wak pa no tin niun bentana habri i evitá trèk. Mayoria bia nan ta bai soño i ora nan lanta for di soño nan ta seku.

Algun otro tep

Ora bo tin mas ku un yu di kachó tin ora ta difísil pa sa kua ta kua. Sigur den komienso anto mas difísil ta si nan tur tin e mesun koló. Bo por marka nan dor di hasi uzo di diferente koló di rushi di una anto bo por rushi un tenchi òf pinta un pida masha chikí den nan nèk. Dia nan bira un tiki mas grandi bo por hasi uzo di streki òf banchi di koló.

Drumí riba un sèrbètè tambe ta un bon manera pa duna nan kuminda

Ora di duna nan bòter òf remedi asina ta bira fásil pa bo distinguí nan i sa kua a haña ainda i kua no. Pone nan tur huntu den un makutu di paña i esun ku bo a duna kaba bo ta buta bek na nan lugá di drumi ku bo a limpia promé. Un ambiente limpi ta sumamente importante. Limpia nan sushi ku regularidat, kambia sèrbètè kada bes ku nan kaba di kome i bo por hasi uzo di korant pa pone bou di e sèrbètè. Limpia tur dia algun bia pa dia ku awa i habon di Disicline òf ku un tiki kloròks. Esaki ta evitá habrimentu di barika i otro inkumbinensia.

Den komienso ta bon pa pisa e yunan di kachó tur dia. Registrá riba un lista di pisa tur dia si e yu di kachó a gana peso. Semper tin yu di kachó mas grandi ku otro den e mesun nèshi. Esei ta normal. Pero lokual ku ta importante ta ku tur dia nan ta subi un tiki di peso. Esun lo subi un tiki  as ku e otro pero por lo general lo bo mira si ku nan ta krese tur dia un tiki.

Un yu di kachó ku ta malu òf ku no ta bebe? No warda mas ku 1 kuminda pa bai serka un veterinario kuné. Yunan di kacho ta sumamente vulnerabel i denter di algun ora e por muri. Si nan ta slap, tin kentura, no ta sinti bon, ta grita hopi, yora hopi, òf netamente ta hopi ketu ni maske ta ora ku nan mester tin hamber, esei ta indikashon ku tin algu no ta bon. Mihó bo bai un bia di mas ku un bia di ménos serka un dòkter.

Mini a Seka, situashon hopi peligroso

O.R.S ta un produkto perfekto pa haña tur salu i mineral paden si akaso bo tin habrimentu di barika. Tambe yunan di kachó ku ta konsiderá deshidratá (a seka) pasobra por ehèmpel nan tabata muchu riba kaya tin hopi benefisio di O.R.S. Hopi bia dòkternan ta rekomendá Pedialyte pero esei ta hopi zut i yunan di kachó ta wal di e smak zut. O.R.S  ta meskos pero solamente e ta ménos zut. O.R.S ta optenibel na Botika i bo ta kumpra nan na saku chikí ku bo mes ta disolvé den awa. Paga tinu si pasobra i Pedialyte i O.R.S ta vense den korto tempu despues ku bo a habri nan. Ora e yu di kachó ta malu no por lubidá di duna nan O.R.S mardugá. Hopi yu di kachó ku tabata muriendo a keda salbá asina, hasiendo uzo tambe di mes di e remedinan preskribí pa un veterinario.

©Rescueracao, 2020